پی ٹی آئی کا مارچ نہیں ہوگا، یہ مارچ کرتے نظر نہیں آ رہے: شیر افضل مروت

اسلام آباد: پاکستان تحریک انصاف (پی ٹی آئی) کے رہنما شیر افضل مروت نے دعویٰ کیا ہے کہ پی ٹی آئی کا مارچ نہیں ہوگا اور موجودہ صورتحال میں پارٹی مارچ کرتی نظر نہیں آ رہی۔

سماء ٹی وی کے پروگرام ’’میرے سوال‘‘ میں گفتگو کرتے ہوئے شیر افضل مروت نے کہا کہ فریقین کے درمیان بات چیت جاری ہے۔ ان کے مطابق اگر مارچ منسوخ کر دیا جائے تو بشریٰ بی بی کو ریلیف دیا جا سکتا ہے۔

شیر افضل مروت کا کہنا تھا کہ اگر بانی پی ٹی آئی عمران خان انہیں مارچ میں شرکت کی ہدایت دیں گے تو وہ ضرور شریک ہوں گے، تاہم ان کے بقول موجودہ حالات میں ’’پی ٹی آئی کا مارچ نہیں ہوگا، یہ مارچ کرتے نظر نہیں آ رہے۔‘‘

انہوں نے دعویٰ کیا کہ تحریک انصاف کے رہنما فیس سیونگ کے لیے راستہ تلاش کر رہے ہیں۔ ان کا کہنا تھا کہ بانی پی ٹی آئی کی قید کے بعد بھی رابطے مکمل طور پر ختم نہیں ہوئے اور تین مرتبہ معاملات بنتے بنتے رہ گئے۔

سہیل آفریدی پر تنقید

شیر افضل مروت نے کہا کہ انہوں نے زندگی میں کبھی کسی کے کہنے پر کوئی کام نہیں کیا۔ ان کے مطابق سہیل آفریدی نے بانی پی ٹی آئی کی رہائی کے لیے کچھ نہیں کیا۔

انہوں نے دعویٰ کیا کہ ان کے فنڈز منجمد کیے گئے ہیں اور ان کے پاس آئینی و قانونی جواز موجود ہے کہ وہ سہیل آفریدی سے خیبر پختونخوا کو ’’چھٹکارا‘‘ دلا سکیں۔ شیر افضل مروت کے مطابق سہیل آفریدی کے وزیراعلیٰ بننے کے چھ ماہ بعد انہوں نے اس حوالے سے درخواست دائر کی تھی۔

پی ٹی آئی رہنما نے سوال اٹھایا کہ اگر بانی پی ٹی آئی نے خیبر پختونخوا کو بند کرنے کا کہا تھا تو ایسا کیوں نہیں کیا گیا۔ انہوں نے اٹک میں راتوں رات دھرنا ختم کیے جانے کے معاملے پر بھی سوال اٹھاتے ہوئے پوچھا کہ یہ فیصلہ کس کے کہنے پر کیا گیا تھا۔

’لڑائی صلح پر ختم ہوگی‘

شیر افضل مروت نے کہا کہ پی ٹی آئی کے ساتھ ظلم و جبر ہوا، لیکن اسی عمل نے پارٹی کو مقبولیت دی۔ ان کا کہنا تھا کہ پی ٹی آئی کو خیرات میں کچھ نہیں ملے گا۔

انہوں نے کہا کہ بانی پی ٹی آئی کی قید کے باوجود رابطے کبھی مکمل طور پر ختم نہیں ہوئے اور مذاکرات کے ذریعے معاملات حل ہونے کی گنجائش موجود ہے۔

شیر افضل مروت کے مطابق موجودہ لڑائی بالآخر صلح پر ختم ہوگی، چاہے یہ معاملہ 28ویں ترمیم کی صورت میں سامنے آئے۔ ان کا کہنا تھا کہ اگر فریقین ایک دوسرے کو معاف کر دیں تو سیاسی کشمکش ختم ہو سکتی ہے۔