بالٹی مور میں محفلِ میلاد النبی ﷺ کا روح پرور انعقاد، عقیدت مندوں کی بھرپور شرکت

بالٹی مور، میری لینڈ: امریکی ریاست میری لینڈ کے شہر بالٹی مور میں محفلِ میلاد النبی ﷺ کا روح پرور اور ایمان افروز انعقاد کیا گیا، جس میں کمیونٹی کے افراد، عقیدت مندوں اور خواتین سمیت بڑی تعداد میں لوگوں نے شرکت کی۔

محفل کے خصوصی مہمان گدی نشین سخی سلطان حق باہو، جناب ریاض الحسن قادری سہروردی رحمۃ اللہ علیہ کے جانشین حضرت زنیر سہروردی قادری تھے۔

محفل کے دوران نعت خوانوں نے بارگاہِ رسالت ﷺ میں گلہائے عقیدت پیش کیے، جبکہ شرکاء نے انتہائی محبت و عقیدت کے ساتھ نعتِ رسولِ مقبول ﷺ سنی۔ محفل کا ماحول درود و سلام اور ذکرِ مصطفیٰ ﷺ سے معطر رہا۔

مقررین نے وائسز آف امریکا سے گفتگو کرتے ہوئے کہا کہ دنیا و آخرت میں کامیابی کا اصل راز اللہ تعالیٰ کی اطاعت اور رسولِ اکرم ﷺ کی اتباع میں ہے۔ ان کا کہنا تھا کہ مسلمانوں کو نبی کریم ﷺ کی تعلیمات اور سنتِ مبارکہ پر عمل کرتے ہوئے اپنی زندگیوں کو اسلامی اقدار کے مطابق ڈھالنا چاہیے۔

مقررین نے موجودہ دور میں اتحاد، محبت، بھائی چارے اور اخوت کو فروغ دینے پر زور دیتے ہوئے کہا کہ نوجوان نسل کو بالخصوص سیرتِ طیبہ ﷺ سے روشناس کرانا وقت کی اہم ضرورت ہے۔

محفل میں بالٹی مور اور گردونواح سے بڑی تعداد میں افراد شریک ہوئے، جبکہ خواتین نے بھی بھرپور شرکت کی۔ شرکاء نے محفلِ میلاد کے انعقاد کو خوش آئند قرار دیتے ہوئے کہا کہ امریکہ میں ایسی مذہبی محافل نئی نسل کو اسلامی تعلیمات اور اپنی مذہبی و ثقافتی اقدار سے جوڑنے میں اہم کردار ادا کرتی ہیں۔

محفل کے اختتام پر دنیا بھر کے مسلمانوں، بالخصوص غزہ و فلسطین کے مظلوم مسلمانوں اور پاکستان کے لیے خصوصی دعا کی گئی۔ امتِ مسلمہ کے اتحاد، امن و سلامتی، خوشحالی اور دنیا بھر میں امن کے قیام کے لیے بھی دعائیں مانگی گئیں۔

محفل کا اختتام درود و سلام اور اجتماعی دعا کے ساتھ ہوا۔