آزاد کشمیر: سردار تنویر الیاس نے پیپلز پارٹی سے استعفیٰ دے دیا، ٹکٹوں کی تقسیم پر اختلافات

(مظفرآباد) آزاد جموں و کشمیر کی سیاست میں ایک اہم پیش رفت سامنے آئی ہے، جہاں سابق وزیراعظم آزاد کشمیر سردار تنویر الیاس نے پاکستان پیپلز پارٹی کی بنیادی رکنیت سے استعفیٰ دے دیا ہے۔

پارٹی ذرائع کے مطابق سردار تنویر الیاس نے اپنا استعفیٰ پارٹی چیئرمین بلاول بھٹو زرداری کو ارسال کر دیا ہے۔ ذرائع کا کہنا ہے کہ وہ آزاد کشمیر میں عام انتخابات کے لیے پارٹی ٹکٹوں کی تقسیم کے طریقۂ کار پر شدید تحفظات رکھتے تھے۔

اطلاعات کے مطابق سردار تنویر الیاس کو وسطی باغ کے حلقے سے پارٹی ٹکٹ جاری نہیں کیا گیا، جس پر انہوں نے اپنی ناراضی کا اظہار کیا تھا۔ ذرائع کے مطابق انہوں نے اس معاملے پر پارٹی قیادت کو اپنے تحفظات سے بھی آگاہ کیا تھا، تاہم معاملہ حل نہ ہونے پر انہوں نے پارٹی رکنیت چھوڑنے کا فیصلہ کیا۔

ذرائع کا مزید کہنا ہے کہ سردار تنویر الیاس اس وقت اپنے قریبی سیاسی ساتھیوں سے مشاورت کر رہے ہیں اور امکان ہے کہ وہ آئندہ چند روز میں ایک پریس کانفرنس کے ذریعے اپنے مستقبل کے سیاسی لائحۂ عمل کا اعلان کریں گے۔

دوسری جانب پیپلز پارٹی کے ذرائع کا مؤقف ہے کہ آزاد جموں و کشمیر میں انتخابی ٹکٹوں کی تقسیم کے دوران دیرینہ اور وفادار کارکنوں کو ترجیح دینے کا فیصلہ کیا گیا ہے، جبکہ حالیہ عرصے میں پارٹی میں شامل ہونے والے رہنماؤں کو پرانے کارکنوں پر فوقیت نہیں دی جائے گی۔

پارٹی ذرائع کے مطابق تمام انتخابی ٹکٹ میرٹ کی بنیاد پر جاری کیے جا رہے ہیں، جبکہ ٹکٹوں سے محروم رہنے والے کارکنوں اور رہنماؤں کے تحفظات دور کرنے کی بھی کوشش کی جا رہی ہے۔

ادھر پارٹی ذرائع نے یہ بھی بتایا ہے کہ پارٹی پالیسی سے متعلق عوامی بیانات دینے پر سردار تنویر الیاس کو شوکاز نوٹس جاری کیے جانے پر بھی غور کیا جا رہا ہے۔

سردار تنویر الیاس کے استعفے کو آزاد کشمیر کی سیاست میں ایک اہم پیش رفت قرار دیا جا رہا ہے، جبکہ سیاسی حلقوں کی نظریں اب ان کے آئندہ فیصلے اور ممکنہ سیاسی اتحاد پر مرکوز ہیں۔