کراچی میں رینجرز کیمپ پر دہشت گرد حملہ ناکام، 3 دہشت گرد ہلاک، 3 جوان شہید، ایک زخمی گرفتار

(کراچی) پاکستان رینجرز کے ایک کیمپ پر دہشت گردوں کی جانب سے حملے کی کوشش سیکیورٹی فورسز نے بروقت اور مؤثر کارروائی کرتے ہوئے ناکام بنا دی۔ پاک فوج کے شعبہ تعلقات عامہ (آئی ایس پی آر) کے مطابق کارروائی کے دوران تین دہشت گرد ہلاک جبکہ ایک زخمی دہشت گرد کو گرفتار کر لیا گیا۔

آئی ایس پی آر کے مطابق حملہ آور کالعدم تنظیم جماعت الاحرار سے تعلق رکھتے تھے اور مرکزی دروازے پر دھماکا کرکے کیمپ میں داخل ہونے کی کوشش کر رہے تھے، تاہم رینجرز کے جوانوں نے فوری جوابی کارروائی کرتے ہوئے ان کے عزائم ناکام بنا دیے۔

بیان کے مطابق گرفتار دہشت گرد کی شناخت افغانستان کے شہری کے طور پر ہوئی ہے، جبکہ واقعے کے بعد علاقے میں دہشت گردوں کی تلاش کے لیے سینیٹائزیشن آپریشن جاری ہے۔

فائرنگ کے تبادلے میں مادرِ وطن کے تین بہادر سپوت جامِ شہادت نوش کر گئے، جبکہ تین دیگر جوان زخمی ہوئے جنہیں فوری طبی امداد فراہم کی جا رہی ہے۔

آئی ایس پی آر کا کہنا ہے کہ عزمِ استحکام کے تحت انسداد دہشت گردی کی کارروائیاں بلا تعطل جاری رہیں گی اور بیرونی سرپرستی میں سرگرم دہشت گردوں اور ان کے سہولت کاروں کے مکمل خاتمے تک یہ آپریشنز جاری رہیں گے۔ بیان میں کہا گیا کہ حملے اور جوانوں کی شہادت کے ذمہ دار عناصر کے خلاف بھرپور جوابی کارروائی کی جائے گی۔

دوسری جانب آرمی چیف اور چیف آف ڈیفنس فورسز نے شہید جوانوں کے اہلِ خانہ سے اظہارِ تعزیت کرتے ہوئے کہا کہ وطن کے دفاع کے لیے دی جانے والی یہ عظیم قربانیاں قوم کے عزم کو مزید مضبوط کرتی ہیں اور ملک دشمن عناصر اپنے مذموم مقاصد میں کبھی کامیاب نہیں ہوں گے۔