ایران کے پاس فیصلہ کرنے کیلئے وقت کم رہ گیا، ٹرمپ کا ایک بار پھر سخت انتباہ

امریکی صدر ڈونلڈ ٹرمپ نے ایران کو ایک بار پھر سخت پیغام دیتے ہوئے کہا ہے کہ تہران کے پاس فیصلہ کرنے کیلئے وقت بہت کم رہ گیا ہے اور اگر جلد معاہدہ نہ کیا گیا تو اسے سنگین نتائج کا سامنا کرنا پڑ سکتا ہے۔

میڈیا رپورٹس کے مطابق امریکی صدر نے اپنے بیان میں کہا کہ ایران کیلئے بہتر یہی ہے کہ وہ امریکا کے ساتھ معاہدہ کرلے کیونکہ اسی میں اس کا فائدہ ہے۔ ان کا کہنا تھا کہ اگر معاہدہ نہ ہوا تو ایران کو بہت بُرے وقت سے گزرنا پڑے گا۔

صدر ٹرمپ نے مزید کہا کہ امریکا ایران کے معاملے پر سخت مؤقف اختیار کیے ہوئے ہے اور تہران کو جلد فیصلہ کرنا ہوگا۔

اس سے قبل بھی ٹرمپ نے سوشل میڈیا پر ایک مبہم لیکن دھمکی آمیز پیغام جاری کیا تھا۔ انہوں نے ایک تصویر شیئر کی جس کے کیپشن میں "طوفان سے پہلے کی خاموشی" تحریر تھا۔

شیئر کی گئی تصویر میں ٹرمپ کو ایک امریکی فوجی افسر کے ہمراہ بحری جہاز پر سوار دیکھا جاسکتا ہے جبکہ پس منظر میں ایرانی پرچم والی ایک فوجی کشتی بھی موجود تھی، جسے مبصرین نے ایران کیلئے سخت سفارتی اشارہ قرار دیا ہے۔

عالمی تجزیہ کاروں کے مطابق امریکا اور ایران کے درمیان بڑھتی ہوئی کشیدگی خطے کی صورتحال کو مزید حساس بنا سکتی ہے۔