گریٹ ہال آف دی پیپل میں ٹرمپ کا شاندار استقبال، شی جن پنگ سے اہم ملاقات

(بیجنگ)امریکی صدر ڈونلڈ ٹرمپ اپنے چینی ہم منصب شی جن پنگ سے اہم ملاقات کیلئے گریٹ ہال آف دی پیپل پہنچ گئے جہاں ان کا شاندار اور والہانہ استقبال کیا گیا۔

چینی صدر شی جن پنگ نے امریکی صدر کا خیر مقدم کیا جبکہ دونوں رہنماؤں نے مصافحہ کیا اور اس موقع پر دونوں ممالک کے وفود کا تعارف بھی کروایا گیا۔ امریکی صدر ٹرمپ کو چینی افواج کے چاق و چوبند دستے نے گارڈ آف آنر پیش کیا۔

ذرائع کے مطابق صدر ٹرمپ اور شی جن پنگ کے درمیان ملاقات میں ایران جنگ، آبنائے ہرمز کی صورتحال، عالمی معیشت، توانائی بحران اور جاری ٹیرف تنازع سمیت اہم عالمی معاملات پر تبادلہ خیال کیا جائے گا۔ ٹیرف جنگ اور توانائی بحران کے بعد دونوں رہنماؤں کی یہ پہلی بڑی ملاقات قرار دی جا رہی ہے۔

خبر ایجنسی کے مطابق امریکی حکام نے عندیہ دیا ہے کہ چین کو آبنائے ہرمز دوبارہ کھلوانے کیلئے ایران پر دباؤ ڈالنے میں زیادہ فعال کردار ادا کرنا چاہیے تاکہ عالمی تجارتی سرگرمیاں اور تیل کی ترسیل معمول پر آ سکے۔

دوسری جانب سیاسی تجزیہ کاروں کا کہنا ہے کہ اگر بیجنگ اس بحران کے حل میں واشنگٹن کی مدد کرتا ہے تو اس کے بدلے چین امریکہ سے مختلف سفارتی اور اقتصادی رعایتیں طلب کر سکتا ہے، جن میں تائیوان سے متعلق معاملات بھی شامل ہو سکتے ہیں۔

ماہرین کے مطابق اس ملاقات کے نتائج نہ صرف خطے بلکہ عالمی سیاست اور معیشت پر بھی گہرے اثرات مرتب کر سکتے ہیں۔