ٹرمپ کا آبنائے ہرمز کو امریکی علاقہ قرار دینے کا اعلان، ایران کو سخت نتائج کی دھمکی

نیویارک :امریکی صدر ڈونلڈ ٹرمپ نے کہا ہے کہ امریکا جلد آبنائے ہرمز کو امریکی علاقہ قرار دینے کے معاملے پر پیش رفت کرے گا، جبکہ ایران کے خلاف اقتصادی دباؤ مزید بڑھانے کا عندیہ بھی دیا ہے۔

نیو یارک میں ناساؤ کاؤنٹی پولیس اکیڈمی کی تقریب سے خطاب کرتے ہوئے صدر ٹرمپ نے کہا کہ امریکا مہنگے ایندھن کی قیمت برداشت کر سکتا ہے، تاہم ایران کو ایٹمی ہتھیار حاصل کرنے کی اجازت نہیں دی جائے گی۔ ان کا کہنا تھا کہ امریکا ایران کو پہلے ہی بری طرح شکست دے چکا ہے۔

ڈونلڈ ٹرمپ نے دعویٰ کیا کہ امریکا کے پاس ایران کو تباہ کرنے کی صلاحیت موجود ہے اور ایران کی ناکہ بندی جاری ہے، جس کے باعث ایرانی جہازوں کے لیے گزرنا ممکن نہیں۔ انہوں نے ایران کے خلاف مزید سخت اقتصادی اقدامات کا عندیہ دیتے ہوئے کہا کہ امریکا ایران کو شدید اقتصادی نقصان پہنچائے گا۔

امریکی صدر نے نیٹو پر بھی تنقید کی اور کہا کہ جب مختلف ممالک کو ضرورت ہوتی ہے تو وہ امریکا سے رابطہ کرتے ہیں، لیکن جب امریکا کو ضرورت پڑی تو نیٹو اس کے ساتھ موجود نہیں تھا۔