صدر ٹرمپ کا نفسیاتی اثرات پیدا کرنے وال ادویات پر بڑا فیصلہ

( واشنگٹن ڈی سی ) امریکی صدر ڈونلڈ ٹرمپ نے ہفتے کے روز ایک اہم ایگزیکٹو آرڈر پر دستخط کرتے ہوئے فوڈ اینڈ ڈرگ ایڈمنسٹریشن کو ہدایت کی ہے کہ وہ نفسیاتی اثرات پیدا کرنے والی ادویات کے جائزے کے عمل کو تیز کرے جنہیں پہلے ہی “انقلابی علاج کی ادویات" کا درجہ دیا جا چکا ہے۔

صدر ٹرمپ نے اس موقع پر گفتگو کرتے ہوئے کہا کہ یہ اقدام ایک اہم سنگِ میل ہے اور اس کا مقصد جدید طبی تحقیق اور علاج تک رسائی کو تیز کرنا ہے۔ ان کے مطابق یہ ادویات اس وقت کلینیکل ٹرائلز کے آخری مراحل میں ہیں تاکہ ان کی حفاظت اور مؤثریت کو یقینی بنایا جا سکے۔

صدر نے کہا کہ اس ایگزیکٹو آرڈر کے ذریعے بیوروکریٹک رکاوٹوں کو کم کیا جائے گا، جبکہ ایف ڈی اے اور ڈیپارٹمنٹ آف ویٹرن افیئرز کے درمیان ڈیٹا شیئرنگ کو بہتر بنایا جائے گا۔ اس کے علاوہ منظور شدہ نفسیاتی ادویات کی درجہ بندی کو جلد تبدیل کرنے کا عمل بھی آسان بنایا جائے گا۔

انہوں نے کہا کہ یہ تجرباتی علاج شدید ذہنی بیماریوں اور ڈپریشن میں مبتلا افراد، خصوصاً سابق فوجیوں، کے لیے امید کی نئی کرن ثابت ہو سکتے ہیں۔ صدر ٹرمپ نے سابق فوجیوں میں خودکشی کی شرح کا حوالہ دیتے ہوئے ان علاجوں کی اہمیت پر زور دیا۔

صدر نے مزید بتایا کہ 2024 میں سٹینفورڈ یونیورسٹی کی ایک تحقیق میں 30 سابق فوجیوں، جو دماغی چوٹ کا شکار تھے، کو ان انقلابی ادویات کا علاج دیا گیا، جس کے نتیجے میں ایک ماہ کے اندر ڈپریشن اور بے چینی کی علامات میں 80 سے 90 فیصد تک کمی دیکھنے میں آئی۔

صدر ٹرمپ نے اعلان کیا کہ ریاست ٹیکساس میں ریپبلکن قیادت پہلے ہی ان انقلابی ادویات کی تحقیق کے لیے 50 ملین ڈالر مختص کر چکی ہے، جبکہ وفاقی حکومت بھی اسی مد میں مزید 50 ملین ڈالر کی سرمایہ کاری کرے گی۔

صدر ٹرمپ نے یہ بھی کہا کہ “رائٹ ٹو ٹرائی” قانون کے تحت شدید بیمار مریضوں کے لیے ان انقلابی ادویات کے استعمال کی راہ ہموار کی جا رہی ہے۔

اپنے بیان کے اختتام پر انہوں نے کہا کہ یہ اقدام ایسے افراد کے لیے نئی امید پیدا کرے گا جو شدید بیماریوں کا شکار ہیں، تاکہ وہ اپنی زندگی دوبارہ بہتر انداز میں گزار سکیں اور خوشگوار زندگی کی طرف لوٹ سکیں۔