ٹرمپ کا ایران سے متعلق اہم فیصلہ مؤخر، وائٹ ہاؤس سچویشن روم اجلاس بے نتیجہ ختم

(واشنگٹن) امریکی صدر ڈونلڈ ٹرمپ کی زیر صدارت وائٹ ہاؤس کے سچویشن روم میں ایران سے متعلق ہونے والا اہم اجلاس کسی حتمی نتیجے پر پہنچے بغیر ختم ہوگیا، جبکہ ایران سے متعلق اہم فیصلے کو مؤخر کر دیا گیا۔

بین الاقوامی خبر ایجنسیوں کے مطابق اجلاس تقریباً دو گھنٹے تک جاری رہا، جس میں ایران کے ساتھ جنگ بندی میں توسیع اور خطے کی مجموعی صورتحال پر غور کیا گیا۔ تاہم اجلاس کے اختتام پر کسی حتمی فیصلے کا اعلان نہیں کیا گیا۔

امریکی اخبار نیویارک ٹائمز نے دعویٰ کیا ہے کہ صدر ٹرمپ ایران سے متعلق پالیسی پر حتمی فیصلہ کرنے میں کامیاب نہ ہو سکے، جس کے باعث معاملہ مزید مشاورت کے لیے مؤخر کر دیا گیا۔

وائٹ ہاؤس نے اجلاس کے اختتام کی تصدیق کی ہے، تاہم اجلاس میں ہونے والی گفتگو اور فیصلوں کی تفصیلات جاری نہیں کی گئیں۔

اس سے قبل امریکی صدر ڈونلڈ ٹرمپ نے ایران کی بحری ناکہ بندی ختم کرنے کا اعلان کرتے ہوئے کہا تھا کہ آبنائے ہرمز میں پھنسے جہاز اب اپنی منزلوں کی جانب روانہ ہو سکتے ہیں۔ ان کا کہنا تھا کہ امریکی کارروائیوں کے نتیجے میں قائم ناکہ بندی ختم کی جا رہی ہے اور آبنائے ہرمز سے آبی بارودی سرنگوں کی صفائی بھی کی جائے گی۔

سیاسی مبصرین کے مطابق وائٹ ہاؤس کے اس اہم اجلاس کے بے نتیجہ ختم ہونے سے ایران سے متعلق امریکی پالیسی کے مستقبل پر سوالات مزید بڑھ گئے ہیں، جبکہ عالمی برادری بھی واشنگٹن کے آئندہ اقدامات پر گہری نظر رکھے ہوئے ہے۔