ٹرمپ کا یورپی یونین کی گاڑیوں پر ٹیرف 25 فیصد کرنے کا اعلان

(واشنگٹن ڈی سی / محمد نعیم اختر ) ڈونلڈ ٹرمپ نے اعلان کیا ہے کہ وہ یورپی یونین سے امریکا آنے والی کاروں اور ٹرکوں پر ٹیرف بڑھا کر 25 فیصد کر رہے ہیں۔

امریکی صدر نے مؤقف اختیار کیا کہ یورپی یونین امریکا کے ساتھ طے شدہ تجارتی معاہدے کی شرائط پر عمل نہیں کر رہی، اسی وجہ سے یہ فیصلہ کیا گیا ہے۔ تاہم انہوں نے اس حوالے سے مزید تفصیلات فراہم نہیں کیں۔

ٹرمپ نے اپنے سوشل میڈیا پلیٹ فارم پر لکھا کہ چونکہ یورپی یونین مکمل طور پر طے شدہ تجارتی معاہدے کی پاسداری نہیں کر رہی، اس لیے آئندہ ہفتے سے یورپی یونین سے درآمد ہونے والی گاڑیوں اور ٹرکوں پر 25 فیصد ٹیرف نافذ ہوگا۔

انہوں نے مزید کہا کہ امریکا میں تیار ہونے والی کاروں اور ٹرکوں پر کوئی اضافی محصول عائد نہیں کیا جائے گا۔

یاد رہے کہ گزشتہ سال یورپی یونین نے امریکا کے ساتھ ایک تجارتی معاہدہ کیا تھا، جس کے تحت امریکی درآمدات پر تمام ٹیرف ختم کرنے پر اتفاق کیا گیا تھا، جبکہ بدلے میں زیادہ تر یورپی مصنوعات پر 15 فیصد ٹیرف عائد کیا گیا تھا تاکہ بڑے تجارتی تنازع سے بچا جا سکے۔

یہ نیا فیصلہ ایسے وقت میں سامنے آیا ہے جب امریکا اور یورپی ممالک کے درمیان ایران جنگ کے پس منظر میں کشیدگی میں اضافہ ہو رہا ہے۔ صدر ٹرمپ نے نیٹو کے یورپی ارکان کو ایران کے خلاف امریکی کوششوں میں ناکافی تعاون پر بھی تنقید کا نشانہ بنایا تھا۔

ماہرین کے مطابق یہ واضح نہیں کہ ٹرمپ کے پاس یورپی یونین پر اضافی ٹیرف عائد کرنے کیلئے کون سا قانونی اختیار موجود ہے، خاص طور پر امریکی سپریم کورٹ کے حالیہ فیصلے کے بعد جس میں یکطرفہ ٹیرف پالیسی پر سوالات اٹھائے گئے تھے۔