یوکرینی صدر زیلنسکی کا سعودی ولی عہد سے رابطہ، ڈرونز معاہدے سمیت مختلف امور پر گفتگو

یوکرینی صدر ولودیمیر زیلنسکی اور سعودی ولی عہد شہزادہ محمد بن سلمان کے درمیان ٹیلی فون پر رابطہ ہوا، جس میں دوطرفہ تعاون سمیت مختلف اہم امور پر تبادلہ خیال کیا گیا۔

گفتگو کے دوران ڈرونز معاہدے، غذائی تحفظ اور یوکرین و سعودی عرب کے درمیان تعاون کو مزید فروغ دینے کے معاملات زیرِ بحث آئے۔ دونوں رہنماؤں نے مختلف شعبوں میں باہمی تعاون بڑھانے پر اتفاق کیا۔

یوکرینی صدر زیلنسکی نے کہا کہ یوکرین سعودی عرب کے ساتھ باہمی تعاون کو مزید مضبوط بنانے کا خواہاں ہے۔ ان کے مطابق یوکرینی حکام کی ایک ٹیم سعودی عرب سمیت خطے میں موجود ہے اور مختلف معاملات پر کام کر رہی ہے۔

زیلنسکی نے مزید کہا کہ یوکرین اور سعودی عرب کے تعلقات میں بعض شعبوں میں اچھی پیش رفت جاری ہے، جبکہ دونوں ممالک کے درمیان تعاون کے مزید مواقع تلاش کیے جا رہے ہیں۔

دونوں رہنماؤں کے درمیان رابطے کو یوکرین اور سعودی عرب کے باہمی تعلقات میں تعاون کے فروغ کی ایک اہم کوشش قرار دیا جا رہا ہے۔