انڈر 18 ہاکی ایشیا کپ: بھارت نے پاکستان کو شکست دے کر فائنل میں جگہ بنا لی

(کاکامیگاہارا ) جاپان میں جاری انڈر 18 ہاکی ایشیا کپ کے سنسنی خیز سیمی فائنل میں بھارت نے پاکستان کو 3 کے مقابلے میں 5 گول سے شکست دے کر فائنل کے لیے کوالیفائی کر لیا، جبکہ قومی ٹیم ایونٹ سے باہر ہوگئی۔

سیمی فائنل میں روایتی حریف پاکستان اور بھارت کے درمیان دلچسپ مقابلہ دیکھنے کو ملا۔ میچ کے تیسرے کوارٹر کے اختتام تک پاکستان کو بھارت پر 2-3 کی برتری حاصل تھی اور قومی ٹیم جیت کی مضبوط امیدوار دکھائی دے رہی تھی۔

تاہم چوتھے اور آخری کوارٹر میں بھارتی ٹیم نے شاندار کم بیک کرتے ہوئے جارحانہ کھیل کا مظاہرہ کیا اور مسلسل تین گول اسکور کرکے میچ کا رخ اپنی جانب موڑ لیا۔ بھارتی کھلاڑی اشیش تانی نے شاندار کارکردگی کا مظاہرہ کرتے ہوئے ہیٹ ٹرک سمیت مجموعی طور پر چار گول اسکور کیے، جو ان کی ٹیم کی کامیابی میں فیصلہ کن ثابت ہوئے۔

پاکستان کی جانب سے عدیل فرحان اسلم اور عزیر نے گول اسکور کیے، تاہم قومی ٹیم آخری لمحات میں اپنی برتری برقرار رکھنے میں ناکام رہی اور 3-5 سے شکست کا سامنا کرنا پڑا۔

اس فتح کے ساتھ بھارت نے انڈر 18 ہاکی ایشیا کپ کے فائنل میں جگہ بنا لی ہے، جہاں اس کا مقابلہ جاپان سے ہوگا۔ دوسری جانب پاکستان اب ایونٹ میں تیسری پوزیشن کے میچ میں ملائیشیا کے مدمقابل آئے گا۔

قومی ٹیم کی شکست پر شائقین ہاکی میں مایوسی پائی جاتی ہے، تاہم ماہرین کا کہنا ہے کہ نوجوان کھلاڑیوں نے پورے ٹورنامنٹ میں مجموعی طور پر اچھی کارکردگی کا مظاہرہ کیا اور مستقبل میں ان سے مزید بہتر کھیل کی توقع کی جا سکتی ہے۔