بغیر اجازت تصاویر اور ویڈیوز کے مبینہ استعمال پر اروشی روٹیلا کا اے آئی کمپنی کو قانونی نوٹس

ممبئی: بالی ووڈ اداکارہ اروشی روٹیلا کی ٹیم نے ان کے نام، تصاویر اور ویڈیوز کے مبینہ طور پر بغیر اجازت استعمال پر لاس اینجلس میں قائم ایک آرٹیفیشل انٹیلی جنس کمپنی کے خلاف قانونی کارروائی شروع کرنے کا دعویٰ کیا ہے۔

اداکارہ کی ٹیم کی جانب سے جاری بیان میں کہا گیا ہے کہ متعلقہ اے آئی کمپنی نے مبینہ طور پر اروشی روٹیلا کی اجازت کے بغیر ان کی شناخت اور ذاتی تصاویر و ویڈیوز استعمال کیں۔

بیان کے مطابق اس معاملے پر قانونی راستہ اختیار کیا جا رہا ہے، جبکہ مبینہ نقصان کے ازالے کے لیے ہرجانے کا تخمینہ فی الحال 7 ہزار کروڑ روپے لگایا گیا ہے۔

اروشی روٹیلا کی ٹیم نے مؤقف اختیار کیا کہ کسی بھی فرد کے نام، تصویر، شناخت یا شباہت کو تجارتی مقاصد کے لیے استعمال کرنے سے قبل متعلقہ فرد کی باقاعدہ اجازت حاصل کرنا ضروری ہے۔

ٹیم کے مطابق قانونی کارروائی کا مقصد اداکارہ کی شناخت، نجی مواد اور متعلقہ حقوق کا تحفظ یقینی بنانا ہے۔

تاہم، کمپنی کی جانب سے اس معاملے پر مؤقف یا قانونی نوٹس کے جواب سے متعلق تفصیلات فی الحال سامنے نہیں آئی ہیں، اس لیے ہرجانے کی رقم اور دیگر قانونی دعووں سے متعلق حتمی فیصلہ متعلقہ قانونی کارروائی کے نتیجے میں ہی واضح ہوگا۔