ٹرمپ کا بڑا دعویٰ، امریکی بحریہ نے آبنائے ہرمز بارودی سرنگوں سے صاف کردی

واشنگٹن: امریکی صدر ڈونلڈ ٹرمپ نے دعویٰ کیا ہے کہ امریکی فوج نے آبنائے ہرمز کو بارودی سرنگوں سے مکمل طور پر صاف کردیا ہے، جبکہ ان کے مطابق اس وقت اہم آبی گزرگاہ کا کنٹرول امریکی بحریہ کے پاس ہے۔

اوول آفس میں صحافیوں سے گفتگو کرتے ہوئے ڈونلڈ ٹرمپ نے کہا کہ آبنائے ہرمز کا کنٹرول اس وقت صرف امریکی بحریہ کے پاس ہے۔

امریکی صدر نے اپنی حکومت کی بحری ناکہ بندی کا ذکر کرتے ہوئے اسے ناقابلِ تسخیر قرار دیا اور کہا کہ یہ ایک فولادی دیوار کی مانند ہے، جبکہ صرف انہی افراد یا جہازوں کو گزرنے کی اجازت دی جاتی ہے جنہیں امریکا اجازت دینا چاہتا ہے۔

ٹرمپ نے آبنائے ہرمز میں بارودی سرنگوں کے حوالے سے بھی گفتگو کی۔ ان کا کہنا تھا کہ صورتحال کچھ پیچیدہ ہے کیونکہ ایران کبھی کبھار اس اہم آبی گزرگاہ میں بارودی سرنگیں بچھا دیتا ہے۔

امریکی صدر کے مطابق امریکی فوج ان بارودی سرنگوں کا سراغ لگانے کی صلاحیت رکھتی ہے اور انہوں نے دعویٰ کیا کہ امریکی فوج نے پوری آبنائے ہرمز کو بارودی سرنگوں سے صاف کردیا ہے۔

آبنائے ہرمز عالمی تجارت کے لیے انتہائی اہم آبی گزرگاہ ہے، جہاں سے عالمی سطح پر تیل کی ترسیل کا ایک بڑا حصہ گزرتا ہے۔ اس لیے خطے میں کسی بھی فوجی کشیدگی یا آبی گزرگاہ میں رکاوٹ کے خدشات عالمی توانائی منڈیوں اور تیل کی قیمتوں پر براہِ راست اثر ڈال سکتے ہیں۔

ٹرمپ کے تازہ دعوے نے آبنائے ہرمز میں امریکی بحری موجودگی، ایران کے ساتھ کشیدگی اور خطے کی سکیورٹی صورتحال پر نئی بحث چھیڑ دی ہے۔