دہشتگرد حملوں کے خلاف پاکستان کو اپنے دفاع کا مکمل حق حاصل ہے، امریکی محکمہ خارجہ

(واشنگٹن) امریکی محکمہ خارجہ نے کہا ہے کہ پاکستان کو دہشتگرد حملوں کے خلاف اپنے دفاع کا مکمل حق حاصل ہے اور امریکا دہشتگردی کے خلاف پاکستان کی کوششوں اور کارروائیوں کی حمایت کرتا ہے۔

غیر ملکی خبر رساں ادارے رائٹرز کے مطابق امریکی محکمہ خارجہ کا کہنا ہے کہ پاکستان کے حقِ دفاع کو عالمی سطح پر حمایت حاصل ہے، جبکہ دہشتگردوں کی حمایت اور سرپرستی کے باعث طالبان حکومت کو شدید تنقید اور دباؤ کا سامنا ہے۔

امریکی محکمہ خارجہ نے اپنے بیان میں کہا کہ پاکستان کے عوام نے دہشتگردی کے خلاف جنگ میں بے پناہ قربانیاں دی ہیں اور امریکا انسدادِ دہشتگردی کے حوالے سے پاکستان کے حقِ دفاع میں کی جانے والی کارروائیوں کی حمایت کرتا ہے۔

واضح رہے کہ پاکستان نے حالیہ دہشتگرد حملوں کے بعد آپریشن غضب للحق کے تحت افغانستان میں مبینہ دہشتگرد ٹھکانوں کو نشانہ بنانے کی کارروائیاں کی ہیں۔ اس سے قبل بھی امریکا پاکستان کو دہشتگردی کے خلاف جنگ میں ایک اہم شراکت دار قرار دے چکا ہے۔

امریکی سینٹرل کمانڈ کے سابق سربراہ جنرل مائیکل کوریلا بھی دہشتگردی کے خلاف جنگ میں پاکستان کے کردار اور انسدادِ دہشتگردی کی کوششوں کی کھل کر تعریف کر چکے ہیں۔

رپورٹس کے مطابق پاکستان کا مؤقف ہے کہ حالیہ دہشتگرد حملوں، جن میں کراچی میں رینجرز کی تنصیبات پر حملہ بھی شامل ہے، کے شواہد اس جانب اشارہ کرتے ہیں کہ پاکستان میں دہشتگردی کے لیے افغان سرزمین استعمال کی جا رہی ہے۔

پاکستان کا کہنا ہے کہ اس نے بین الاقوامی قوانین کے تحت اپنے دفاع کے حق کو استعمال کرتے ہوئے دہشتگردوں کے مبینہ ٹھکانوں کو نشانہ بنایا، جبکہ ماہرین کے مطابق امریکی محکمہ خارجہ کا حالیہ بیان دہشتگردی کے خلاف پاکستان کے مؤقف کو مزید تقویت دیتا ہے۔

افواجِ پاکستان کا کہنا ہے کہ آپریشن غضب للحق کے تحت دہشتگرد گروہوں اور ان کے سہولت کاروں کے خاتمے کے لیے کارروائیاں جاری رہیں گی۔