ایران شدید مشکلات سے دوچار، آبنائے ہرمز کھولنے کی خواہش ظاہر کی: ٹرمپ کا دعویٰ

(واشنگٹن) امریکی صدر ڈونلڈ ٹرمپ نے دعویٰ کیا ہے کہ ایران اس وقت شدید مشکلات سے دوچار ہے اور امریکا سے آبنائے ہرمز کی ناکہ بندی ختم کرنے کی خواہش ظاہر کر چکا ہے۔

سوشل میڈیا پر جاری اپنے بیان میں ڈونلڈ ٹرمپ نے کہا کہ ایران نے اطلاع دی ہے کہ وہ “تباہی کی حالت” میں ہے اور اپنی موجودہ قیادت سے متعلق صورتحال کو سمجھنے کی کوشش کر رہا ہے۔

صدر ٹرمپ کے مطابق ایران چاہتا ہے کہ امریکا فوری طور پر آبنائے ہرمز کی ناکہ بندی ختم کرے تاکہ اہم بحری گزرگاہ کو دوبارہ مکمل طور پر کھولا جا سکے۔

انہوں نے مزید کہا کہ ایران اس وقت کمزور اور مشکل پوزیشن میں ہے جبکہ وہاں کے عوام بھی اپنی قیادت کی صورتحال کو سمجھنے کی کوشش کر رہے ہیں۔

امریکی صدر کا کہنا تھا کہ خطے کی صورتحال تیزی سے بدل رہی ہے اور ایران پر بڑھتا ہوا دباؤ اسے مذاکرات اور عملی اقدامات کی طرف لے جا رہا ہے۔

ٹرمپ نے اس بات کا بھی اشارہ دیا کہ اگر مناسب پیش رفت ہوئی تو آئندہ دنوں میں مزید سفارتی سرگرمیاں سامنے آ سکتی ہیں۔