ایران کی تازہ تجاویز سے مطمئن نہیں، ٹرمپ کا دوٹوک اعلان

(واشنگٹن ڈی سی / محمد نعیم اختر ) ڈونلڈ ٹرمپ نے واضح طور پر کہا ہے کہ وہ ایران کی تازہ ترین تجاویز سے مطمئن نہیں ہیں اور تہران کو مزید مناسب اور واضح تجاویز پیش کرنی چاہئیں۔

میڈیا سے گفتگو کرتے ہوئے امریکی صدر نے کہا کہ ایران ڈیل کرنا چاہتا ہے، تاہم موجودہ تجاویز امریکا کیلئے قابلِ قبول نہیں۔ انہوں نے کہا کہ پاکستان کی بہت عزت کرتے ہیں اور شہباز شریف اور سید عاصم منیر کی بھی بہت عزت کرتے ہیں۔

ٹرمپ نے کہا کہ ایران سے مذاکرات جاری ہیں لیکن معاملات آگے نہیں بڑھ رہے۔ ان کے مطابق ایران کے پاس نہ مؤثر فضائیہ باقی ہے اور نہ ہی بحریہ، کیونکہ بہت کچھ تباہ ہو چکا ہے۔

امریکی صدر کا کہنا تھا کہ ایرانی قیادت کے اندر اتحاد نہیں ہے اور مختلف رہنما مختلف مؤقف اختیار کر رہے ہیں، جس کی وجہ سے مذاکرات پیچیدہ ہو رہے ہیں۔ انہوں نے کہا کہ انہیں یقین نہیں کہ کسی حتمی معاہدے تک پہنچا جا سکے گا۔

ڈونلڈ ٹرمپ نے مزید کہا کہ وہ کسی صورت نہیں چاہتے کہ ایران کے پاس ایٹمی ہتھیار ہوں، جبکہ آبنائے ہرمز اب بھی بند ہے اور خطے کی صورتحال بدستور تشویشناک ہے۔

انہوں نے واضح الفاظ میں کہا کہ اب یہ ایران پر منحصر ہے کہ وہ مستقل حل چاہتا ہے یا صرف وقتی ڈیل۔