پاکستان کے عظیم وزیراعظم اور فیلڈ مارشل دو شاندار شخصیات ہیں: صدر ٹرمپ

(واشنگٹن )امریکی صدر ڈونلڈ ٹرمپ نے پاکستان کا شکریہ ادا کرتے ہوئے کہا ہے کہ پاکستان کے عظیم وزیراعظم اور فیلڈ مارشل دو شاندار شخصیات ہیں جبکہ آج کا دن پوری دنیا کیلئے ایک شاندار دن ہے۔

امریکی صدر ڈونلڈ ٹرمپ نے سوشل میڈیا پر جاری بیان میں سعودی عرب، قطر اور متحدہ عرب امارات کا بھی شکریہ ادا کرتے ہوئے کہا کہ ان ممالک نے بہادری اور مدد کا مظاہرہ کیا۔

صدر ٹرمپ نے کہا کہ آبنائے ہرمز مکمل طور پر کھلی اور آمد و رفت کیلئے تیار ہے، تاہم ایران کے حوالے سے ناکہ بندی بدستور برقرار رہے گی اور معاہدہ مکمل طور پر پایہ تکمیل تک پہنچنے تک ناکہ بندی جاری رہے گی۔

انہوں نے کہا کہ یہ عمل بہت تیزی سے مکمل ہو جانا چاہیے جبکہ زیادہ تر نکات پہلے ہی طے ہو چکے ہیں۔ ان کا کہنا تھا کہ امریکا ایران کے ایٹمی مواد کو حاصل کرے گا اور اس کے بدلے کسی بھی صورت میں کوئی رقم کا تبادلہ نہیں ہوگا۔

صدر ٹرمپ نے واضح کیا کہ یہ معاہدہ لبنان سے مشروط نہیں ہے اور امریکا لبنان کے حوالے سے الگ سے کام کرے گا، جبکہ حزب اللہ کے مسئلے سے بھی مناسب انداز میں نمٹا جائے گا۔ انہوں نے دعویٰ کیا کہ اسرائیل اب لبنان پر بمباری نہیں کرے گا اور امریکا نے اسرائیل کو روک دیا ہے۔

امریکی صدر نے کہا کہ آبنائے ہرمز کھلنے کے بعد نیٹو کی جانب سے رابطہ کیا گیا تاہم انہوں نے نیٹو کو دور رہنے کا مشورہ دیا اور کہا کہ ضرورت پڑی تو صرف تیل کی فراہمی سے متعلق بتایا جائے گا۔

صدر ٹرمپ کے مطابق ایران امریکا کی مدد سے سمندری بارودی سرنگیں ہٹا رہا ہے اور کچھ مائنز پہلے ہی ہٹائی جا چکی ہیں۔

انہوں نے ایک بار پھر سعودی عرب، قطر اور متحدہ عرب امارات کا تعاون پر شکریہ ادا کیا۔