امریکی صدر ڈونلڈ ٹرمپ نے وٹکوف اور جیرڈ کشنر کا دورۂ پاکستان منسوخ کر دیا

واشنگٹن: امریکی صدر ڈونلڈ نے امریکی خصوصی ایلچی اسٹیو وٹکوف اور اپنے داماد جیرڈ کشنر کا مجوزہ دورۂ پاکستان منسوخ کر دیا ہے۔

صدر ٹرمپ نے کہا کہ اسٹیو وٹکوف اور جیرڈ کشنر اب پاکستان نہیں جا رہے کیونکہ ایران جب چاہے کسی بھی وقت امریکا سے براہِ راست بات کر سکتا ہے۔

انہوں نے کہا کہ امریکی وفد 18 گھنٹے کی طویل پرواز کے بعد وہاں جا کر بے مقصد باتوں کیلئے نہیں بیٹھے گا، کیونکہ مذاکرات کیلئے تمام کارڈز امریکا کے پاس ہیں۔

ٹرمپ کا کہنا تھا کہ اس جنگ میں امریکا مضبوط پوزیشن میں ہے اور جب تمام اہم آپشنز ہمارے پاس موجود ہیں تو ایران کے ساتھ مذاکرات کیلئے اتنا طویل سفر کرنا فائدہ مند نہیں۔

انہوں نے مزید کہا کہ سفر میں بہت زیادہ وقت ضائع ہوتا ہے جبکہ دیگر اہم امور بھی موجود ہیں، اس لیے اگر ایران بات کرنا چاہتا ہے تو انہیں صرف امریکا کو کال کرنی ہے۔

صدر ٹرمپ نے ایرانی قیادت کے اندرونی حالات پر بھی تبصرہ کرتے ہوئے کہا کہ ایران میں شدید اندرونی خلفشار اور کنفیوژن موجود ہے، کسی کو معلوم نہیں کہ اصل میں فیصلہ ساز کون ہے۔

امریکی نشریاتی ادارےسی این این کے مطابق صدر ٹرمپ نے امریکی اور ایرانی وفود کی اسلام آباد میں مجوزہ ملاقات بھی منسوخ کر دی ہے، جہاں سیزفائر اور جنگ بندی سے متعلق بات چیت متوقع تھی۔

واضح رہے کہ وائٹ ہاؤس کی ترجمان نے جمعے کو اعلان کیا تھا کہ وٹکوف اور کشنر ہفتے کو پاکستان روانہ ہوں گے، تاہم اب امریکی حکمت عملی میں نمایاں تبدیلی سامنے آئی ہے۔