متوقع بارشوں کے پیشِ نظر کراچی انتظامیہ الرٹ، رین ایمرجنسی سے نمٹنے کے اقدامات شروع

کراچی میں متوقع بارشوں کے پیشِ نظر کمشنر کراچی سید حسن نقوی نے شہر کی تمام انتظامی اور بلدیاتی اداروں کو الرٹ رہنے کے احکامات جاری کر دیے ہیں۔ کمشنر نے ہدایت کی کہ تمام ڈپٹی کمشنرز، بلدیہ عظمیٰ، کنٹونمنٹ بورڈز، واٹر اینڈ سیوریج کارپوریشن، ٹاؤن ایڈمنسٹریشن، محکمہ صحت، سالڈ ویسٹ، اور کے الیکٹرک سمیت تمام متعلقہ ادارے کسی بھی ہنگامی صورتحال سے نمٹنے کے لیے مکمل تیار رہیں۔

کمشنر آفس نے رین ایمرجنسی کے لیے ریسکیو ہیلپ لائن 1299 کو الرٹ کر دیا ہے، تاکہ شہری کسی بھی مدد کے لیے فوری رابطہ کر سکیں۔ تمام ڈپٹی کمشنرز کو ہدایت دی گئی ہے کہ وہ اپنے دفاتر میں قائم کنٹرول روم متحرک کریں اور فوری طور پر ہیلپ ڈیسک قائم کریں۔

کمشنر کراچی نے تمام اداروں سے کہا ہے کہ وہ اپنے ہنگامی منصوبوں کی تفصیلات کمشنر آفس میں جمع کرائیں تاکہ بارش کے دوران کسی بھی قسم کے خطرے سے مؤثر طور پر نمٹا جا سکے۔