دشمن نے زمینی کارروائی کی تو کوئی اہلکار زندہ واپس نہیں جائے گا، ایرانی فوجی سربراہ کی سخت وارننگ

ایران کی مسلح افواج کے سربراہ جنرل امیر حاتمی نے خبردار کیا ہے کہ دشمن کی کسی بھی جارحیت کا سخت جواب دیا جائے گا اور اگر زمینی کارروائی کی کوشش کی گئی تو دشمن کا کوئی بھی اہلکار زندہ واپس نہیں جا سکے گا۔

ایرانی سرکاری خبر رساں ایجنسی ارنا کے مطابق جنرل امیر حاتمی نے اعلیٰ عسکری قیادت کے اجلاس سے خطاب کرتے ہوئے آپریشنل ہیڈ کوارٹرز کو ہدایت دی کہ دشمن کی نقل و حرکت کو انتہائی درستگی کے ساتھ مانیٹر کیا جائے اور کسی بھی ممکنہ حملے کے فوری اور مؤثر جواب کے لیے مکمل تیاری رکھی جائے۔

انہوں نے فوجی کمانڈرز کو امریکا اور اسرائیل کی سرگرمیوں پر مسلسل نظر رکھنے کی ہدایت کرتے ہوئے کہا کہ کسی بھی ممکنہ زمینی کارروائی کا بروقت اور بھرپور جواب دیا جائے گا۔ ان کا کہنا تھا کہ دشمن کی کسی بھی جارحیت کو ناکام بنانے کے لیے تمام وسائل بروئے کار لائے جائیں گے۔

سرکاری میڈیا کے مطابق امیر حاتمی نے مزید کہا کہ اگر مخالفین نے زمینی حملے کی کوشش کی تو انہیں واپس جانے کا موقع نہیں دیا جائے گا۔ ان کے اس بیان کو خطے میں بڑھتی ہوئی کشیدگی کے تناظر میں اہم قرار دیا جا رہا ہے۔

ایرانی سرکاری میڈیا کی جانب سے جاری ویڈیو میں جنرل امیر حاتمی کو دیگر فوجی کمانڈرز کے ساتھ اجلاس میں شریک دکھایا گیا، جہاں وہ ویڈیو لنک کے ذریعے مختلف عسکری حکام سے بھی رابطے میں تھے، تاہم اس ویڈیو کے وقت کی آزادانہ تصدیق نہیں ہو سکی۔

دوسری جانب ایران کے خاتم الانبیا سینٹرل ہیڈ کوارٹر کے ترجمان لیفٹیننٹ کرنل ابراہیم ذوالفقاری نے بھی خبردار کیا ہے کہ ایران کے اسٹریٹجک میزائل، ڈرون اور فضائی دفاعی نظام کے مراکز امریکا اور اسرائیل کی پہنچ سے باہر ہیں۔

انہوں نے کہا کہ ایران کی عسکری پیداوار خفیہ اور محفوظ مقامات پر ہوتی ہے، جن تک دشمنوں کی رسائی ممکن نہیں۔ ان کا مزید کہنا تھا کہ اگر ایران کی حساس عسکری تنصیبات کو نشانہ بنانے کی کوشش کی گئی تو دشمن کو ناقابلِ تلافی نقصان اٹھانا پڑے گا۔

ترجمان نے واضح کیا کہ جنگ اس وقت تک جاری رہے گی جب تک ایران کے دشمن مکمل پسپائی اختیار نہیں کر لیتے، جبکہ ایران اپنی دفاعی صلاحیتوں کو مزید مضبوط بنانے کے لیے تیار ہے۔