ایران میں گرنے والے امریکی طیارے کے پائلٹ کی تلاش، 66 ہزار ڈالر انعام کی پیشکش

(تہران )ایرانی آؤٹ لیٹس کے مطابق حالیہ جھڑپوں کے دوران ایک امریکی لڑاکا طیارہ ایران میں مار گرایا گیا تھا۔ رپورٹس میں دعویٰ کیا گیا کہ طیارے کے عملے کے دو ارکان میں سے ایک نے ایجیکٹ کیا اور امکان ہے کہ وہ ایران کے جنوبی علاقے میں اترا ہو۔

امریکی حکام کا کہنا ہے کہ طیارے کے ایک پائلٹ کو بچا لیا گیا ہے، تاہم عملے کا ایک رکن تاحال لاپتہ ہے، جس کی تلاش جاری ہے۔

ایرانی حکومت سے وابستہ چینلز نے شہریوں کو انعام کی پیشکش کرتے ہوئے کہا ہے کہ لاپتہ پائلٹ کو زندہ پکڑنے پر 66 ہزار امریکی ڈالر دیے جائیں گے۔

دریں اثنا جنوبی خوزیستان سے ایک غیر تصدیق شدہ ویڈیو بھی سامنے آئی ہے، جس میں متعدد افراد کو اسلحہ اور ایرانی پرچم کے ساتھ مبینہ طور پر لاپتہ پائلٹ کی تلاش کرتے ہوئے دیکھا جا سکتا ہے۔ ویڈیو میں ایک شخص کو یہ کہتے ہوئے بھی سنا گیا کہ "انشاء اللہ ہم اسے تلاش کر لیں گے"۔

تاہم اس ویڈیو اور ان دعوؤں کی آزاد ذرائع سے تصدیق نہیں ہو سکی۔