12 اگست کو آسمان پر 6 سیاروں کی نایاب قطار، فلکیاتی شائقین کیلئے شاندار منظر

اسلام آباد: فلکیاتی شائقین کے لیے 12 اگست ایک خاص دن ثابت ہونے جا رہا ہے، جب آسمان پر 6 سیارے ایک ہی سمت میں قطار کی صورت میں دکھائی دیں گے۔ اس فلکیاتی منظر کو ’پلینٹری پریڈ‘ (Planetary Parade) کہا جاتا ہے۔

فلکیاتی ماہرین کے مطابق مشتری، عطارد، مریخ، زحل، یورینس اور نیپچون طلوعِ آفتاب سے قبل آسمان پر نظر آسکتے ہیں۔ یہ سیارے مشرقی افق سے جنوب مغربی آسمان تک ایک قوس کی شکل میں دکھائی دیں گے۔

کیا سیارے واقعی ایک سیدھی لائن میں ہوں گے؟

ماہرین کے مطابق سیارے خلا میں حقیقتاً ایک سیدھی قطار میں موجود نہیں ہوں گے، بلکہ زمین سے مشاہدے کے دوران ان کا ایک ہی سمت میں دکھائی دینا ’پلینٹری پریڈ‘ کہلاتا ہے۔

مریخ اور زحل نسبتاً آسانی سے عام آنکھ سے دیکھے جا سکیں گے، جبکہ عطارد اور مشتری افق کے قریب ہونے کی وجہ سے ان کا مشاہدہ قدرے مشکل ہوگا۔

یورینس اور نیپچون کو دیکھنے کے لیے دوربین یا بائنوکیولر کی ضرورت پڑے گی۔ ماہرین کے مطابق صاف اور کھلا مشرقی افق اس فلکیاتی منظر کے مشاہدے کے لیے زیادہ موزوں رہے گا۔

پرسیڈ میٹیور شاور بھی عروج پر ہوگا

12 اگست کو فلکیاتی شائقین کو ایک اور اہم منظر دیکھنے کا موقع ملے گا، کیونکہ پرسیڈ میٹیور شاور بھی اپنے عروج پر ہوگا۔

ماہرین کے مطابق نئے چاند کے باعث آسمان نسبتاً تاریک رہنے کی توقع ہے، جس سے شہابیوں کو دیکھنے کے امکانات بہتر ہوں گے۔

یوں 12 اگست کو آسمان پر سیاروں کی قطار کے ساتھ ساتھ پرسیڈ میٹیور شاور بھی فلکیاتی شائقین کے لیے ایک یادگار منظر پیش کرے گا۔