امریکا دھمکی آمیز لہجہ بدلے تو مذاکرات کیلئے تیار ہیں: عباس عراقچی

(تہران) عباس عراقچی نے کہا ہے کہ اگر امریکا اپنا دھمکی آمیز لہجہ تبدیل کرے تو ایران مذاکرات کیلئے تیار ہے۔

ایک بیان میں ایرانی وزیر خارجہ نے کہا کہ ایران ہمیشہ سفارتی حل کا حامی رہا ہے، تاہم دباؤ، دھمکیوں اور یکطرفہ شرائط کے تحت کسی قسم کی بات چیت ممکن نہیں۔

انہوں نے واضح کیا کہ ایران کی مسلح افواج ہر قسم کی ممکنہ جارحیت کا بھرپور جواب دینے کی مکمل صلاحیت رکھتی ہیں اور ملک کے دفاع کیلئے پوری طرح تیار ہیں۔

عباس عراقچی نے کہا کہ قومی سلامتی، خودمختاری اور ایران کے بنیادی مفادات پر کسی قسم کا سمجھوتہ نہیں کیا جائے گا، اور تہران اپنے دفاعی حق سے پیچھے نہیں ہٹے گا۔

انہوں نے مزید کہا کہ خطے میں امن و استحکام کے قیام کیلئے برابری، باہمی احترام اور انصاف کی بنیاد پر مذاکرات ناگزیر ہیں۔

یاد رہے کہ ایران نے جنگ بندی معاہدے سے متعلق نئی تجاویز پاکستان کے ذریعے امریکا کو بھجوا دی ہیں، جس کے بعد دونوں ممالک کے درمیان سفارتی سرگرمیوں میں تیزی دیکھی جا رہی ہے۔