عباس عراقچی نے اسرائیل کی مبینہ سازشوں اور فالس فلیگ کارروائیوں سے خبردار کر دیا

ایران کے وزیر خارجہ عباس عراقچی نے مصر کو خطے کا ایک اہم شراکت دار اور دوست ملک قرار دیتے ہوئے اسرائیل کی مبینہ سازشوں اور فالس فلیگ کارروائیوں سے محتاط رہنے پر زور دیا ہے۔

عباس عراقچی نے سماجی رابطے کی ویب سائٹ ایکس پر جاری اپنے بیان میں کہا کہ "مصر کی سلامتی ہماری اولین ترجیح ہے" اور خطے میں امن و استحکام کے لیے ایران اور مصر کے درمیان تعاون انتہائی اہمیت کا حامل ہے۔

انہوں نے دعویٰ کیا کہ اسرائیل کی مبینہ سازشوں اور فالس فلیگ کارروائیوں سے ہوشیار رہنے کی ضرورت ہے، کیونکہ ان کے بقول خطے کو عدم استحکام سے دوچار کرنے کی کوششیں جاری ہیں۔

ایرانی وزیر خارجہ نے مزید کہا کہ "خطرہ واضح اور مشترکہ ہے، جبکہ مسلم اتحاد دشمن عناصر کو قبول نہیں ہے۔" ان کا کہنا تھا کہ موجودہ حالات میں اسلامی ممالک کے درمیان اتحاد اور تعاون ہی خطے کے امن و استحکام کو یقینی بنا سکتا ہے۔

تاہم، عباس عراقچی نے اپنے بیان میں اسرائیل سے متعلق جن الزامات کا ذکر کیا، ان کے حق میں کوئی شواہد پیش نہیں کیے، اور اسرائیل کی جانب سے اس بیان پر فوری طور پر کوئی ردعمل سامنے نہیں آیا۔