بھارت میں گرفتاریوں کو پاکستان سے جوڑنے کے الزامات بدنیتی پر مبنی ہیں: دفتر خارجہ

اسلام آباد: پاکستان نے بھارت میں ہونے والی بعض گرفتاریوں کو پاکستان سے جوڑنے کے بھارتی الزامات کو مسترد کرتے ہوئے انہیں بے بنیاد اور بدنیتی پر مبنی قرار دیا ہے۔

ترجمان دفتر خارجہ نے بھارتی وزیر داخلہ کے الزامات پر ردعمل دیتے ہوئے کہا کہ بھارت کی جانب سے پاکستان کے خلاف اس قسم کا پراپیگنڈا ایک منظم اور بدنیتی پر مبنی مہم کا حصہ ہے۔ ترجمان کے مطابق اس مہم کا مقصد بھارت کو درپیش اندرونی سکیورٹی چیلنجز سے عالمی اور ملکی توجہ ہٹانا ہے۔

دفتر خارجہ نے کہا کہ بھارت سیاسی مفادات کے حصول کے لیے پاکستان کو موردِ الزام ٹھہراتا رہتا ہے، جبکہ خود بھارت بیرونِ ملک دہشت گردی برآمد کرنے اور دہشت گرد عناصر کی معاونت میں ملوث رہا ہے۔

ترجمان کے مطابق پاکستان کے خلاف بے بنیاد الزامات بھارت کی مبینہ تخریبی سرگرمیوں سے عالمی توجہ نہیں ہٹا سکتے۔ پاکستان بھارت کی جانب سے لگائے جانے والے الزامات کو مسترد کرتا ہے اور اس حوالے سے اپنے مؤقف پر قائم ہے۔

بیان میں مزید کہا گیا کہ پاکستان بھارت کے دہشت گردی اور تخریبی سرگرمیوں میں ملوث ہونے کے شواہد متعدد بار عالمی سطح پر پیش کر چکا ہے۔ دفتر خارجہ نے بھارتی شہری کلبھوشن یادیو کے معاملے کو بھی بھارت کی تخریبی سرگرمیوں کا ناقابلِ تردید ثبوت قرار دیا۔

پاکستانی دفتر خارجہ نے واضح کیا کہ بھارت کو اپنے اندرونی سکیورٹی مسائل کا ذمہ دار پاکستان کو ٹھہرانے کے بجائے ان چیلنجز کی وجوہات پر توجہ دینی چاہیے۔