نیویارک کے ٹائمز اسکوائر میں چاقو حملہ، بینک آف امریکا کی نائب صدر ہلاک

نیویارک: امریکی شہر نیویارک کے مصروف علاقے ٹائمز اسکوائر میں چاقو کے حملے کے نتیجے میں بینک آف امریکا کی نائب صدر ہلاک ہوگئیں۔

امریکی میڈیا کے مطابق ایک خاتون نے ٹائمز اسکوائر میں بینک آف امریکا کی نائب صدر پر اچانک چاقو سے حملہ کردیا، جس کے نتیجے میں وہ شدید زخمی ہوئیں اور جانبر نہ ہوسکیں۔

خبر ایجنسی کے مطابق ابتدائی اطلاعات سے ظاہر ہوتا ہے کہ حملہ بظاہر بلااشتعال اور بے ترتیب نوعیت کا تھا۔ واقعے کے بعد حملہ آور خاتون دو چاقو لہراتے ہوئے پولیس کی جانب بڑھی اور تقریباً چار منٹ تک ہتھیار پھینکنے سے انکار کرتی رہی۔

پولیس نے کارروائی کرتے ہوئے حملہ آور خاتون کو قابو میں لے لیا اور اسے حراست میں لے کر تحقیقات شروع کردی ہیں۔

پولیس حکام واقعے کے محرکات اور حملہ آور کے ممکنہ پس منظر کا جائزہ لے رہے ہیں، جبکہ مزید تحقیقات جاری ہیں۔

میئرنیویارک اور پولیس کمشنر کا کہنا ہے کہ واقعے کا دہشت گردی سے کوئی تعلق نہیں، حملہ بظاہر اچانک اور انفرادی نوعیت کا تھا۔