26 برس تک رنگ پر راج کرنے والے بروک لیسنر نے ریٹائرمنٹ کا اعلان کر دی

ورلڈ ریسلنگ انٹرٹینمنٹ (ڈبلیو ڈبلیو ای) کے لیجنڈ اور متعدد بار عالمی چیمپئن رہنے والے بروک لیسنر نے 26 برس پر محیط شاندار ریسلنگ کیریئر کے بعد باضابطہ طور پر ریٹائرمنٹ کا اعلان کر دیا۔

بروک لیسنر نے یہ اعلان ڈبلیو ڈبلیو ای کے سال کے دوسرے بڑے ایونٹ سمر سِلیم میں اپنا آخری مقابلہ کھیلنے کے بعد کیا، جہاں انہیں نائجیریا سے تعلق رکھنے والے ابھرتے ہوئے ریسلر اوبا فیمی کے ہاتھوں ہیل اِن اے سیل (Hell in a Cell) میچ میں شکست کا سامنا کرنا پڑا۔

یہ مقابلہ شائقین کے لیے انتہائی یادگار ثابت ہوا، کیونکہ فولادی پنجرے کے خطرناک ہیل اِن اے سیل مقابلے میں بروک لیسنر کو اپنے کیریئر میں پہلی بار شکست ہوئی۔ میچ کے اختتام پر رنگ میں جذباتی مناظر دیکھنے میں آئے۔

شکست کے بعد بروک لیسنر نے اوبا فیمی کا ہاتھ بلند کرتے ہوئے انہیں ڈبلیو ڈبلیو ای کا "مستقبل" قرار دیا، جبکہ خود کو ریسلنگ کی دنیا کا "ماضی" کہا۔ ان کے اس جذبے کو حاضرین نے زبردست داد دی۔

بعد ازاں دی پیٹ میکافی شو میں گفتگو کرتے ہوئے بروک لیسنر نے اپنے ریٹائرمنٹ کے فیصلے کی باضابطہ تصدیق کی۔ انہوں نے کہا، "میں آج دنیا بھر کے اپنے مداحوں کو بتانا چاہتا ہوں کہ میں اب ریٹائر ہو چکا ہوں۔ آپ سب کی محبت، عزت اور حمایت پر دل کی گہرائیوں سے شکر گزار ہوں۔"

لیسنر نے اپنے کیریئر کے آغاز کو یاد کرتے ہوئے کہا کہ وہ ساؤتھ ڈکوٹا کے ایک فارم ہاؤس سے تعلق رکھنے والے ایک عام نوجوان تھے، جنہوں نے بڑے خواب دیکھے اور محنت کے ذریعے انہیں حقیقت میں بدلا۔

انہوں نے بتایا کہ اب وہ اپنی زندگی کا زیادہ وقت خاندان کے ساتھ گزارنا چاہتے ہیں، اپنے بچوں کے کھیلوں کے سفر میں ان کی رہنمائی کریں گے اور فطرت کے قریب ایک پُرسکون زندگی بسر کرنے کا ارادہ رکھتے ہیں۔

بروک لیسنر کی ریٹائرمنٹ کے اعلان کے بعد دنیا بھر سے ریسلنگ کے مداحوں، سابق ریسلرز اور کھیل سے وابستہ شخصیات نے انہیں خراجِ تحسین پیش کرتے ہوئے ان کے 26 سالہ شاندار کیریئر کو ڈبلیو ڈبلیو ای کی تاریخ کا ایک یادگار باب قرار دیا۔