کیلیفورنیا سینیٹ میں پاک امریکا تعلقات اور پاکستانی امریکی کمیونٹی کو خراجِ تحسین

کیلیفورنیا کی ریاستی سینیٹ نے پاکستان اور امریکا کے دیرینہ تعلقات اور پاکستانی امریکی کمیونٹی کی نمایاں خدمات کو خراجِ تحسین پیش کرتے ہوئے ایک تاریخی قرارداد متفقہ طور پر منظور کرلی۔

ریاستی سینیٹر میلیسا ہرتاڈو کی جانب سے پیش کی گئی قرارداد میں کیلیفورنیا کی معیشت، ثقافت اور سماجی زندگی میں پاکستانی امریکی کمیونٹی کے مثبت کردار کو سراہا گیا۔ قرارداد کی منظوری پر سفیر پاکستان رضوان سعید شیخ نے سینیٹر میلیسا ہرتاڈو کی قیادت اور حمایت پر اظہارِ تشکر کیا۔

اس موقع پر ریاستی اسمبلی کے رکن میٹ ہینی نے پاک امریکا اقتصادی تعاون اور دوطرفہ تعلقات کے فروغ میں پاکستانی نژاد امریکی کاروباری شخصیات اور سرمایہ کاروں کی خدمات کو بھی سراہا۔ انہوں نے سفیر پاکستان کے کردار کو بھی قابلِ قدر قرار دیا۔

یہ قرارداد سفیر پاکستان رضوان سعید شیخ کے کیلیفورنیا کے سرکاری دورے کے موقع پر منظور کی گئی۔ دورے کے دوران سفیر پاکستان نے ریاستی قانون سازوں سے اہم ملاقاتیں کیں، جن میں پاکستان اور کیلیفورنیا کے درمیان تجارت، سرمایہ کاری اور اقتصادی تعاون کو مزید فروغ دینے کے امکانات پر تبادلہ خیال کیا گیا۔

سفیر پاکستان نے کیلیفورنیا کے قانون سازوں کو پاکستان کا دورہ کرنے کی دعوت بھی دی۔ انہوں نے پاکستانی امریکی کمیونٹی کو دونوں ممالک کے درمیان مضبوط روابط، معاشی شراکت داری اور عوامی سطح پر تعلقات کے فروغ میں اہم پل قرار دیا۔

قرارداد کی متفقہ منظوری کو پاک امریکا تعلقات اور پاکستانی امریکی کمیونٹی کی خدمات کے اعتراف کے طور پر اہم پیش رفت قرار دیا جا رہا ہے۔