ایران معاہدہ: ٹرمپ نے مسودہ اسرائیل سمیت اتحادی ممالک کو بھیج دیا، برطانوی اخبار کا دعویٰ

(واشنگٹن) امریکی صدر ڈونلڈ ٹرمپ نے ایران کے ساتھ ممکنہ معاہدے کا مسودہ اسرائیل سمیت اتحادی ممالک کو بھجوا دیا ہے۔ یہ دعویٰ ایک برطانوی اخبار کی رپورٹ میں کیا گیا ہے۔

رپورٹ کے مطابق مجوزہ معاہدے میں اہم علاقائی اور اقتصادی نکات شامل کیے گئے ہیں، جن میں آبنائے ہرمز کو کھولنے اور امریکی ناکہ بندی ختم کرنے سے متعلق شقیں بھی شامل ہیں۔

برطانوی اخبار کا کہنا ہے کہ مفاہمت کی یادداشت کے تحت ایران کو اپنے 12 ارب ڈالر کے منجمد اثاثوں تک رسائی دی جا سکتی ہے، جبکہ آبنائے ہرمز کو 30 روز کے اندر جنگ سے پہلے کی سطح پر بحال کرنے کی تجویز بھی زیر غور ہے۔

رپورٹ میں مزید بتایا گیا ہے کہ چین اس معاہدے کی حتمی توثیق اقوام متحدہ سے کروانے کا خواہاں ہے تاکہ معاہدے کو بین الاقوامی قانونی حیثیت حاصل ہو سکے۔

دوسری جانب اس حوالے سے نہ تو امریکہ اور نہ ہی ایران کی جانب سے باضابطہ طور پر کسی معاہدے کی تفصیلات کی تصدیق کی گئی ہے، تاہم خطے میں جاری سفارتی سرگرمیوں نے عالمی توجہ حاصل کر لی ہے۔

تجزیہ کاروں کے مطابق اگر یہ معاہدہ طے پا جاتا ہے تو اس کے مشرق وسطیٰ کی سیاسی، معاشی اور سلامتی کی صورتحال پر دور رس اثرات مرتب ہو سکتے ہیں۔