ٹرمپ کا بڑا دعویٰ: ایران کے ساتھ امن معاہدے پر ہفتے کے آخر یا پیر تک دستخط متوقع

امریکی صدر ڈونلڈ ٹرمپ نے دعویٰ کیا ہے کہ ایران کے ساتھ ایک اہم معاہدے پر ہفتے کے آخر یا پیر کے روز دستخط ہو سکتے ہیں، جس سے مشرقِ وسطیٰ میں کشیدگی کم ہونے کی امید پیدا ہو گئی ہے۔

معروف امریکی نیوز ویب سائٹ ایگزیوس کو دیے گئے انٹرویو میں صدر ٹرمپ نے کہا کہ ایرانی وزیر خارجہ عباس عراقچی کی حالیہ سوشل میڈیا پوسٹ انتہائی مثبت ہے، جبکہ ایران نے نجی سطح پر غلط معلومات جاری کیے جانے پر معذرت بھی کی ہے۔

ایگزیوس کی رپورٹ کے مطابق جمعرات کی شام تک ایرانی قیادت کی اعلیٰ سطح پر مجوزہ معاہدے کی منظوری دی جا چکی تھی، تاہم ذرائع کا کہنا ہے کہ حتمی منظوری ابھی تک سپریم لیڈر مجتبیٰ خامنہ ای کی جانب سے نہیں دی گئی۔

اس سے قبل صدر ٹرمپ نے ایرانی میڈیا میں امن معاہدے کی مبینہ تفصیلات لیک ہونے پر شدید ردعمل دیتے ہوئے انہیں جعلی قرار دیا تھا۔ ان کا کہنا تھا کہ میڈیا میں سامنے آنے والی شرائط کا دونوں ممالک کے درمیان تحریری طور پر طے پانے والی شرائط سے کوئی تعلق نہیں۔

یاد رہے کہ صدر ٹرمپ نے حال ہی میں ایرانی وزیر خارجہ عباس عراقچی کا ایک بیان بھی سوشل میڈیا پر شیئر کیا تھا، جس میں انہوں نے کہا تھا کہ اسلام آباد میں جاری سفارتی کوششوں کے نتیجے میں مفاہمتی یادداشت پر فریقین پہلے سے کہیں زیادہ قریب آ چکے ہیں۔

تجزیہ کاروں کے مطابق اگر یہ معاہدہ طے پا جاتا ہے تو یہ نہ صرف ایران اور امریکا کے تعلقات میں ایک اہم پیش رفت ہوگی بلکہ خطے کے امن و استحکام پر بھی اس کے دور رس اثرات مرتب ہو سکتے ہیں۔