صدرٹرمپ کا بڑا اعلان: ایران کے خلاف نئی جنگ نہیں کریں گے

واشنگٹن: امریکی صدر ڈونلڈ ٹرمپ نے اپنے مشیروں کو یقین دہانی کرائی ہے کہ وہ ایران کے خلاف دوبارہ جنگ نہیں کریں گے اور خطے میں کشیدگی بڑھانے کے بجائے سفارتی حل کو ترجیح دیتے ہیں۔

امریکی اخبار وال اسٹریٹ جرنل کی رپورٹ کے مطابق صدر ٹرمپ نے واضح کیا ہے کہ جب تک ایران کی جانب سے امریکی فوجیوں کو براہِ راست نشانہ نہیں بنایا جاتا، امریکا کسی نئی فوجی کارروائی یا جنگ میں شامل نہیں ہوگا۔

یہ پیشرفت ایسے وقت میں سامنے آئی ہے جب واشنگٹن اور تہران کے درمیان کشیدگی ایک بار پھر بڑھ رہی ہے، حالیہ دنوں میں دونوں ممالک کے درمیان جنگ بندی کے بعد کے سب سے سنگین فوجی واقعات پیش آئے ہیں، ایران نے خطے میں امریکی فوجی تنصیبات اور کویت انٹرنیشنل ایئرپورٹ کو میزائلوں اور ڈرونز سے نشانہ بنایا، جن حملوں میں ایک شخص کے ہلاک ہونے کی اطلاعات ہیں۔

آبنائے ہرمز کے معاملے پر جاری تنازع نے عالمی منڈیوں میں بھی تشویش پیدا کر دی ہے، جس کے باعث توانائی کی فراہمی اور بین الاقوامی بحری تجارت متاثر ہوئی ہے، ایران نے اس اہم آبی گزرگاہ سے تجارتی جہازوں کی آمدورفت پر پابندیاں عائد کی ہیں، جبکہ امریکہ نے ایرانی بندرگاہوں کے خلاف اقدامات کے ذریعے دباؤ برقرار رکھا ہوا ہے۔

امریکی وزیر خارجہ مارکو روبیو نے تازہ فوجی کارروائیوں کو دفاعی ردِعمل قرار دیتے ہوئے کہا کہ یہ مکمل جنگ کی واپسی کی علامت نہیں ہیں۔