امریکہ، وینزویلا، جاپان سمیت مختلف ممالک میں شدید زلزلے، سونامی وارننگ جاری

(نیویارک ) دنیا کے مختلف خطوں میں آنے والے طاقتور زلزلوں نے خوف و ہراس پھیلا دیا ہے۔ وینزویلا، امریکہ، جاپان، میکسیکو اور کریبین جزائر سمیت کئی ممالک میں زلزلے کے شدید جھٹکے محسوس کیے گئے ہیں، جبکہ متعدد ساحلی علاقوں کے لیے سونامی وارننگ بھی جاری کر دی گئی ہے۔

امریکی جیولوجیکل سروے (USGS) کے مطابق امریکی ریاست کیلیفورنیا میں 5.6 شدت کا زلزلہ ریکارڈ کیا گیا، جس کے جھٹکے وسیع علاقے میں محسوس کیے گئے۔ ابتدائی رپورٹس کے مطابق کسی بڑے جانی نقصان کی فوری اطلاع موصول نہیں ہوئی، تاہم حکام صورتحال کا مسلسل جائزہ لے رہے ہیں۔

دوسری جانب وینزویلا میں یکے بعد دیگرے آنے والے 7.1 اور 7.5 شدت کے طاقتور زلزلوں نے بڑے پیمانے پر تباہی مچا دی۔ مقامی ذرائع کے مطابق دارالحکومت کراکس سے تقریباً 284 کلومیٹر مشرق میں واقع زلزلے کے مرکز کے قریب متعدد عمارتیں منہدم ہو گئی ہیں، جن میں ایک 22 منزلہ عمارت بھی شامل ہے۔

ماہرین نے خدشہ ظاہر کیا ہے کہ شدید زلزلے کے نتیجے میں ہلاکتوں کی تعداد ہزاروں تک پہنچ سکتی ہے۔ بعض ابتدائی تخمینوں کے مطابق اموات 10 ہزار سے تجاوز کرنے کا اندیشہ ظاہر کیا جا رہا ہے، تاہم سرکاری سطح پر تاحال حتمی اعداد و شمار جاری نہیں کیے گئے۔

زلزلے کے بعد وینزویلا کے ساحلی علاقوں میں سونامی وارننگ جاری کر دی گئی ہے، جبکہ حکومت نے ملک بھر میں ہنگامی حالت نافذ کرتے ہوئے امدادی اور ریسکیو سرگرمیوں میں تیزی لانے کی ہدایت کی ہے۔

ادھر جاپان کی موسمیاتی ایجنسی کے مطابق شمالی جاپان کے ساحلی علاقے ایواتی کے قریب 6.9 شدت کا زلزلہ ریکارڈ کیا گیا، جس کی گہرائی تقریباً 50 کلومیٹر تھی۔ زلزلے کے جھٹکے دارالحکومت ٹوکیو سمیت مختلف شہروں میں محسوس کیے گئے۔

جاپانی حکام کے مطابق متاثرہ علاقہ زلزلوں کے حوالے سے انتہائی حساس زون میں شمار ہوتا ہے۔ جاپان کے وزیر دفاع نے فوج کو متاثرہ علاقوں میں فضائی نگرانی اور نقصانات کا فوری جائزہ لینے کی ہدایت جاری کر دی ہے۔

حکام نے ساحلی علاقوں کے مکینوں کو احتیاطی تدابیر اختیار کرنے اور مقامی انتظامیہ کی ہدایات پر عمل کرنے کی تاکید کی ہے، جبکہ امدادی ادارے کسی بھی ہنگامی صورتحال سے نمٹنے کے لیے الرٹ ہیں۔