فہد مصطفیٰ کی پنجاب حکومت سے سینما اوقات میں توسیع کی اپیل

(لاہور)معروف پاکستانی اداکار اور پروڈیوسر فہد مصطفیٰ نے پنجاب حکومت سے سینما گھروں کے اوقاتِ کار میں نرمی کرنے کی اپیل کرتے ہوئے کہا ہے کہ موجودہ پابندیوں کے باعث فلم انڈسٹری کو مشکلات کا سامنا ہے۔

فہد مصطفیٰ نے صوبائی وزیر اطلاعات و ثقافت مریم اورنگزیب کے نام ایک کھلا خط لکھا جس میں انہوں نے مؤقف اختیار کیا کہ کفایت شعاری پالیسی کے تحت شاپنگ مالز اور ان کے اندر قائم سینما گھروں کو شام 8 بجے بند کرنے کی ہدایت دی گئی ہے، جس سے سینما بزنس متاثر ہو رہا ہے۔

اداکار نے اپنے خط میں کہا کہ زیادہ تر افراد دن کے اوقات میں اپنے پیشہ ورانہ اور ذاتی معاملات میں مصروف ہوتے ہیں، اس لیے وہ شام اور رات کے وقت ہی سینما کا رخ کرتے ہیں۔ ایسے میں سینما گھروں کے محدود اوقات فلم بینوں کی تعداد میں کمی کا باعث بن رہے ہیں۔

انہوں نے نشاندہی کی کہ حالیہ ریلیز ہونے والی فلموں کی باکس آفس کارکردگی بھی متاثر ہو رہی ہے کیونکہ انہیں ناظرین تک پہنچنے کے لیے مناسب وقت میسر نہیں آ رہا۔

فہد مصطفیٰ کے مطابق اگر سینما گھروں کے اوقات میں معمولی توسیع کر دی جائے تو اس سے ٹکٹوں کی فروخت میں اضافہ ہوگا، فلمی صنعت کو سہارا ملے گا اور روزگار کے مزید مواقع بھی پیدا ہوں گے۔

انہوں نے پنجاب حکومت کی جانب سے فلم انڈسٹری کے فروغ کے لیے کیے جانے والے اقدامات کو سراہتے ہوئے کہا کہ لاہور فلم سٹی جیسے منصوبے خوش آئند ہیں، تاہم سینما اوقات میں نرمی بھی صنعت کی بحالی کے لیے اہم ثابت ہو سکتی ہے۔

واضح رہے کہ فہد مصطفیٰ کی نئی فلم زومبیڈ عیدالاضحیٰ کے موقع پر ریلیز ہوئی تھی اور ملک بھر کے سینما گھروں میں نمائش کے لیے پیش کی گئی۔