بھارت دہشت گردی کا سہارا لے رہا ہے، ہر پاکستانی کے خون کا بدلہ لیں گے: فیلڈ مارشل عاصم منیر

(راولپنڈی) چیف آف ڈیفنس فورسز فیلڈ مارشل عاصم منیر نے کہا ہے کہ بھارت ایک بار پھر دہشت گردی کی گھناؤنی روش اختیار کر رہا ہے، تاہم پاکستان ہر بے گناہ پاکستانی کے خون کا بدلہ لے گا اور دہشت گردی کے خلاف جنگ آخری دہشت گرد کے خاتمے تک جاری رہے گی۔

جی ایچ کیو راولپنڈی میں “معرکۂ حق” کی پہلی یادگاری تقریب سے خطاب کرتے ہوئے فیلڈ مارشل عاصم منیر نے کہا کہ آج کا دن پوری قوم اور مسلح افواج کے لیے باعثِ فخر ہے کیونکہ دشمن کی جارحیت کا قومی اتحاد، جرأت اور پیشہ ورانہ مہارت سے بھرپور جواب دیا گیا۔

تقریب کے آغاز پر فیلڈ مارشل عاصم منیر، پاک فضائیہ کے سربراہ ایئر چیف مارشل ظہیر احمد بابر سدھو اور سربراہ پاک بحریہ ایڈمرل نوید اشرف نے شہدا کی یادگار پر حاضری دی، پھول چڑھائے جبکہ مسلح افواج کے چاق و چوبند دستوں نے سلامی پیش کی۔

اپنے خطاب میں فیلڈ مارشل نے کہا کہ “معرکۂ حق” دو نظریات کے درمیان ایک فیصلہ کن معرکہ تھا جس میں حق کو کامیابی اور باطل کو شکست کا سامنا کرنا پڑا۔ انہوں نے کہا کہ بھارت خطے میں طاقت کا توازن تبدیل کرنے کے خواب دیکھ رہا ہے لیکن پاکستان اس کے عزائم کبھی کامیاب نہیں ہونے دے گا۔

انہوں نے کہا کہ پاکستان کے دفاع کو مکمل طور پر ناقابلِ تسخیر بنا دیا گیا ہے اور دشمن جان لے کہ مستقبل میں کسی بھی مہم جوئی کے نتائج انتہائی خطرناک اور دور رس ہوں گے۔ فیلڈ مارشل کے مطابق فتح میزائلوں اور پاک فضائیہ کے شاہینوں نے دشمن کے 26 سے زائد عسکری اہداف کو کامیابی سے نشانہ بنایا۔

فیلڈ مارشل عاصم منیر نے کہا کہ جدید جنگیں ملٹی ڈومین آپریشنز پر مشتمل ہوں گی جن میں ڈرونز، سائبر وارفیئر اور آرٹیفشل انٹیلی جنس اہم کردار ادا کریں گے، اسی مقصد کے لیے ڈیفنس فورسز ہیڈکوارٹرز قائم کیے گئے ہیں تاکہ افواجِ پاکستان کو جدید تقاضوں سے ہم آہنگ کیا جا سکے۔

انہوں نے سعودی عرب کے ساتھ اسٹریٹجک باہمی دفاعی معاہدے کو پاکستان کی بڑی سفارتی کامیابی قرار دیا اور کہا کہ پاکستان اپنی متوازن اور ذمہ دار سفارتکاری کے ذریعے خطے میں امن کے لیے اہم کردار ادا کر رہا ہے۔

فیلڈ مارشل نے افغانستان پر زور دیا کہ وہ اپنی سرزمین پر دہشت گردی کے مراکز اور محفوظ پناہ گاہوں کا مکمل خاتمہ یقینی بنائے۔ انہوں نے خیبر پختونخوا اور بلوچستان کے عوام، افواجِ پاکستان اور قانون نافذ کرنے والے اداروں کی قربانیوں کو خراجِ تحسین بھی پیش کیا۔

انہوں نے کہا کہ پاکستان کشمیری عوام کی سیاسی، سفارتی اور اخلاقی حمایت جاری رکھے گا اور پاکستان کا سبز ہلالی پرچم امید، استحکام اور قومی وحدت کی علامت ہے۔