فیلڈ مارشل عاصم منیر کی ایرانی صدر پزشکیان، باقر قالیباف اور عباس عراقچی سے ملاقاتیں

( تہران )ایرانی دارالحکومت تہران میں ڈاکٹر مسعود پزشکیان سے خصوصی ملاقات کے دوران دونوں رہنماؤں نے خطے کی مجموعی صورتحال، سفارتی روابط اور امن و استحکام کے فروغ پر گفتگو کی۔ اس موقع پر باقر قالیباف اور عباس عراقچی بھی موجود تھے۔

ذرائع کے مطابق ملاقات میں مغربی ایشیا میں بڑھتی کشیدگی کم کرنے اور مذاکرات کے ذریعے مسائل کے حل پر زور دیا گیا۔ فریقین نے خطے میں پائیدار امن کے لیے سفارتی اقدامات جاری رکھنے پر اتفاق بھی کیا۔

فیلڈ مارشل عاصم منیر نے بعد ازاں باقر قالیباف سے علیحدہ ملاقات بھی کی، جس میں ایران اور امریکا کے درمیان جاری مذاکرات اور ممکنہ امن معاہدے سے متعلق امور زیر بحث آئے۔

اس سے قبل پاکستانی وفد اور عباس عراقچی کے درمیان ہونے والی ملاقات میں مغربی ایشیا کی سکیورٹی صورتحال، خطے میں امن و استحکام اور سفارتی کوششوں پر تفصیلی تبادلہ خیال کیا گیا۔

یاد رہے کہ فیلڈ مارشل عاصم منیر گزشتہ روز ایران پہنچے تھے جہاں ان کا استقبال سکندر مومنی نے کیا۔

دوسری جانب محسن نقوی بھی ایران میں موجود ہیں اور وہ ایرانی حکام سے مختلف ملاقاتوں میں خطے کی صورتحال اور ایران امریکا تنازعات میں کمی کے امکانات پر تبادلہ خیال کر رہے ہیں۔

ایرانی میڈیا کے مطابق پاکستان خطے میں سفارتی رابطوں اور ثالثی کی کوششوں میں متحرک کردار ادا کر رہا ہے، جبکہ فیلڈ مارشل عاصم منیر کا دورہ بھی انہی سفارتی کوششوں کا حصہ قرار دیا جا رہا ہے۔