فیفا ورلڈ کپ 2026: 1248 کھلاڑی، 48 ٹیمیں اور 104 میچز، تاریخ کا سب سے بڑا ٹورنامنٹ

(زیورخ) فیفا ورلڈ کپ 2026 کے لیے تمام 48 قومی ٹیموں کے حتمی اسکواڈز کا اعلان کر دیا گیا ہے، جس کے بعد یہ ایونٹ تاریخ کا سب سے بڑا فٹبال ورلڈ کپ بن گیا ہے۔ رواں ٹورنامنٹ میں مجموعی طور پر 1248 کھلاڑی شرکت کریں گے۔

امریکا، میکسیکو اور کینیڈا کی مشترکہ میزبانی میں منعقد ہونے والا فیفا ورلڈ کپ 2026 پہلا ایسا ورلڈ کپ ہوگا جس میں 48 ٹیمیں ایکشن میں نظر آئیں گی۔ تمام ٹیموں کو 12 گروپس میں تقسیم کیا گیا ہے، جبکہ ہر گروپ میں 4 ٹیمیں شامل ہیں۔ ایونٹ کے دوران مجموعی طور پر 104 میچز کھیلے جائیں گے۔

فیفا کے مطابق 1248 شریک کھلاڑیوں میں سے 357 ایسے ہیں جو ماضی میں بھی ورلڈ کپ کھیل چکے ہیں، جبکہ 891 کھلاڑی پہلی مرتبہ عالمی فٹبال کے سب سے بڑے اسٹیج پر جلوہ گر ہوں گے۔

فٹبال کے سپر اسٹارز لیونل میسی، کرسٹیانو رونالڈو اور گیلرمو اوچوا اپنے کیریئر کا چھٹا ورلڈ کپ کھیلنے کے لیے تیار ہیں، جو ایک منفرد اعزاز تصور کیا جا رہا ہے۔

اس ورلڈ کپ میں 4 ممالک کیپ ورڈے، کوراساؤ، اردن اور ازبکستان پہلی بار شرکت کر رہے ہیں، جس سے ٹورنامنٹ کی عالمی نمائندگی مزید وسیع ہو گئی ہے۔

عمر کے اعتبار سے ایونٹ میں سب سے کم عمر کھلاڑی 17 سال جبکہ سب سے عمر رسیدہ کھلاڑی 43 سال کا ہے۔ ٹورنامنٹ میں 40 سال سے زائد عمر کے 7 کھلاڑی اور 20 سال سے کم عمر کے 22 نوجوان فٹبالرز بھی شامل ہیں۔

دنیا کے سب سے بڑے فٹبال میلے کا آغاز 12 جون 2026 سے ہوگا، جہاں شائقین کو سنسنی خیز مقابلوں اور نئے ریکارڈز کی توقع ہے۔