یو اے ای اور یورو بانڈز کی ادائیگی کیلئے انتظامات مکمل، وزیر خزانہ محمد اورنگزیب

(اسلام آباد) اسلام آباد میں موجودہ معاشی صورتحال پر غیر رسمی گفتگو کرتے ہوئے وزیر خزانہ محمد اورنگزیب کا کہنا تھا کہ خطے میں کشیدہ صورتحال کے پیش نظر محتاط معاشی پالیسیاں ترتیب دینے کی ضرورت ہے۔ انہوں نے کہا کہ زرمبادلہ ذخائر کو مستحکم رکھا جائے گا اور آئی ایم ایف کے طے شدہ اہداف کو برقرار رکھا جائے گا۔

وزیر خزانہ نے کہا کہ پاکستان کی بروقت ادائیگیوں کے حوالے سے تمام کمٹمنٹس پوری کی جائیں گی جبکہ کمرشل فنانسنگ اور بانڈز کے اجرا کیلئے تیاریاں بھی جاری ہیں۔ ان کا کہنا تھا کہ کمرشل فنانسنگ کیلئے بینکوں کے کنسورشیم سے بات چیت جاری ہے۔

محمد اورنگزیب نے بتایا کہ اپریل کے اختتام سے پانڈا بانڈز کے اجرا کیلئے دوبارہ تیاریاں شروع کی جائیں گی۔ حکومت مجموعی طور پر ایک ارب ڈالر کے پانڈا بانڈز جاری کرنے کا ارادہ رکھتی ہے۔ انہوں نے کہا کہ رواں مالی سال کیلئے مقررہ فنانسنگ اہداف کمٹمنٹ کے مطابق پورے کیے جائیں گے۔

انہوں نے مزید کہا کہ پاکستان پہلی مرتبہ پانڈا بانڈز جاری کر رہا ہے، جس کے باعث اس عمل میں وقت لگ رہا ہے۔ وزیر خزانہ کے مطابق خطے میں کشیدہ صورتحال کے ممکنہ معاشی اثرات کا بھی جائزہ لیا جا رہا ہے۔

وزیر خزانہ محمد اورنگزیب کا کہنا تھا کہ آئی ایم ایف کے ساتھ طے شدہ پالیسیوں کے باعث معیشت درست سمت میں گامزن ہے جبکہ آئندہ دنوں میں اہم معاشی فیصلے اور بجٹ کی تیاریاں بھی کی جائیں گی۔