فیفا ورلڈ کپ 2026ء کے افتتاحی میچ میں منفرد ریکارڈ قائم، 3 ریڈ کارڈز نے تاریخ رقم کر دی

(میکسیکو )فیفا فٹبال ورلڈ کپ 2026ء کے افتتاحی میچ میں ایک منفرد اور غیر معمولی ریکارڈ قائم ہوگیا، جب میچ کے دوران مجموعی طور پر تین کھلاڑیوں کو ریڈ کارڈ دکھا کر میدان سے باہر بھیج دیا گیا۔

ورلڈ کپ کے افتتاحی مقابلے میں میزبان میکسیکو نے جنوبی افریقہ کو دو صفر سے شکست دے کر ایونٹ کا فاتحانہ آغاز کیا، تاہم میچ میں سخت مقابلے اور جارحانہ کھیل نے بھی توجہ حاصل کی۔

ریفری نے کھیل کے دوران جنوبی افریقہ کے دو جبکہ میکسیکو کے ایک کھلاڑی کو ریڈ کارڈ دکھایا۔ فٹبال ورلڈ کپ کی تاریخ میں یہ پہلا موقع ہے کہ افتتاحی میچ میں بیک وقت تین ریڈ کارڈز جاری کیے گئے ہوں، جس کے باعث یہ مقابلہ ریکارڈ بک کا حصہ بن گیا۔

اعداد و شمار کے مطابق فیفا ورلڈ کپ کی تاریخ میں اب تک سات ایسے میچ کھیلے جا چکے ہیں جن میں تین یا اس سے زیادہ ریڈ کارڈز دکھائے گئے۔ اس فہرست میں سب سے نمایاں مقابلہ 2006ء کے ورلڈ کپ میں پرتگال اور نیدرلینڈز کے درمیان کھیلا گیا تھا، جہاں ریفری نے چار کھلاڑیوں کو ریڈ کارڈ دکھایا تھا۔

ماہرین کے مطابق افتتاحی میچ میں اتنی بڑی تعداد میں ریڈ کارڈز کا سامنے آنا غیر معمولی واقعہ ہے، جس نے ورلڈ کپ 2026ء کے آغاز کو مزید یادگار بنا دیا ہے۔