راولاکوٹ میں شہید اہلکاروں کی سرکاری اعزاز کے ساتھ نماز جنازہ، امن دشمن عناصر کے خلاف کارروائی جاری

(راولاکوٹ) راولاکوٹ میں پرتشدد واقعات کے دوران شہید ہونے والے اہلکاروں کی نماز جنازہ سرکاری اعزاز کے ساتھ ادا کر دی گئی۔ نماز جنازہ میں اعلیٰ حکام، سیکیورٹی اہلکاروں، شہدا کے اہل خانہ اور شہریوں کی بڑی تعداد نے شرکت کی۔

نماز جنازہ سول لائنز راولاکوٹ میں منعقد ہوئی جہاں شہدا کو مکمل سرکاری اعزاز کے ساتھ سپردِ خاک کرنے سے قبل خراجِ عقیدت پیش کیا گیا۔

اس موقع پر آئی جی آزاد کشمیر پولیس نے خطاب کرتے ہوئے کہا کہ شہریوں نے کالعدم جوائنٹ ایکشن کمیٹی کو مسترد کر دیا ہے اور ریاست میں امن و امان کی صورتحال خراب کرنے کی کسی کو اجازت نہیں دی جائے گی۔

انہوں نے کہا کہ سیکیورٹی فورسز اور قانون نافذ کرنے والے ادارے آزاد کشمیر میں امن کے قیام اور شہریوں کے تحفظ کے لیے مکمل طور پر پُرعزم ہیں۔ ان کے مطابق حالیہ پرتشدد حملوں میں 3 اہلکار شہید جبکہ 40 سے زائد زخمی ہو چکے ہیں۔

آئی جی پولیس نے الزام عائد کیا کہ بعض شرپسند عناصر نے معصوم شہریوں کو ورغلا کر بدامنی پھیلانے کی کوشش کی، تاہم سیکیورٹی فورسز نے انتہائی پیشہ ورانہ انداز میں صورتحال کو کنٹرول کیا اور امن و امان برقرار رکھا۔

انہوں نے اس عزم کا اظہار کیا کہ قانون کی عملداری کو ہر صورت یقینی بنایا جائے گا اور ریاست کے امن کو نقصان پہنچانے والے عناصر کے خلاف قانونی کارروائی جاری رہے گی۔

حکام کے مطابق علاقے میں سیکیورٹی کے انتظامات مزید سخت کر دیے گئے ہیں جبکہ امن و استحکام برقرار رکھنے کے لیے تمام ضروری اقدامات کیے جا رہے ہیں۔