لبنان سے اسرائیل کے مکمل انخلا تک ہتھیار نہیں ڈالیں گے، حزب اللہ کے سربراہ نعیم قاسم کا دوٹوک اعلان

لبنان کی مزاحمتی تنظیم حزب اللہ کے سربراہ نعیم قاسم نے واضح کیا ہے کہ اسرائیل کے لبنان سے مکمل انخلا تک تنظیم ہتھیار نہیں ڈالے گی اور اس معاملے پر کسی قسم کی بات چیت نہیں ہوگی۔

اپنے بیان میں نعیم قاسم نے کہا کہ حزب اللہ کا صبر کمزوری کی علامت نہیں بلکہ ایک سوچی سمجھی حکمت عملی کا حصہ ہے۔ ان کے بقول ثابت قدمی ہی کامیابی کا راستہ ہے، جبکہ دریائے لیطانی کے شمال میں حزب اللہ کو غیر مسلح کرنے کا سوال ہی پیدا نہیں ہوتا۔

انہوں نے کہا کہ اسرائیلی جارحیت کا مقصد حزب اللہ کا خاتمہ تھا، تاہم اسرائیل اپنے اس مقصد میں ناکام رہا۔ ان کا کہنا تھا کہ لبنان سے اسرائیلی افواج کے مکمل انخلا تک ہتھیار ڈالنے کے معاملے پر کوئی بات نہیں ہوگی۔

نعیم قاسم نے مزید کہا کہ لبنانی حکام ملک کی آدھی آبادی کو خود سے دور کرنے کے متحمل نہیں ہو سکتے۔ انہوں نے کہا کہ اگر لبنانی حکومت قومی خودمختاری کے راستے پر گامزن رہتی ہے تو حزب اللہ اس کا بھرپور ساتھ دے گی۔

حزب اللہ کے سربراہ نے لبنانی حکام پر زور دیا کہ وہ امریکا اور اسرائیل کے مفادات کے لیے کام کرنا بند کریں۔ انہوں نے یہ بھی دعویٰ کیا کہ ایران اور امریکا کے درمیان ہونے والا معاہدہ واشنگٹن اور اسرائیل کی شکست کا باقاعدہ اعلان ہے۔

نعیم قاسم کے مطابق ایران اپنی مضبوطی، استقامت اور مستقل مزاجی کے باعث اس مفاہمتی مرحلے تک پہنچنے میں کامیاب ہوا۔