سرائیل نے جنوبی لبنان پر حملے نہ روکے تو فیصلہ کن جواب دیں گے، ایران کی سخت وارننگ

(تہران) ایرانی مسلح افواج کے مرکزی کمانڈ خاتم الانبیاء سینٹرل ہیڈکوارٹر نے اسرائیل کو سخت انتباہ دیتے ہوئے کہا ہے کہ اگر جنوبی لبنان میں جاری عسکری کارروائیاں بند نہ کی گئیں تو ایران فیصلہ کن جواب دینے کی صلاحیت رکھتا ہے۔

ایرانی فوج کے ترجمان کی جانب سے جاری بیان میں کہا گیا ہے کہ گزشتہ دو روز کے دوران اسرائیلی افواج نے مبینہ طور پر جنوبی لبنان میں جنگ بندی معاہدے کی 84 بار خلاف ورزی کی ہے، جس کے نتیجے میں عام شہریوں کی ہلاکتیں ہوئی ہیں اور خطے میں کشیدگی مزید بڑھ گئی ہے۔

بیان کے مطابق امریکی صدر ڈونلڈ ٹرمپ کی جانب سے جنگ بندی اور کشیدگی میں کمی کے دعوؤں کے باوجود زمینی حقائق مختلف ہیں اور اسرائیلی فوجی کارروائیاں مسلسل جاری ہیں۔

خاتم الانبیاء ہیڈکوارٹر نے واضح کیا کہ اگر اسرائیل نے جنوبی لبنان میں اپنی فوجی کارروائیاں نہ روکیں تو ایرانی مسلح افواج مناسب، مؤثر اور سخت جواب دینے کے لیے مکمل طور پر تیار ہیں۔

ایرانی فوجی قیادت نے اپنے بیان میں مزید کہا کہ خطے میں کسی بھی قسم کی جارحیت کا بھرپور مقابلہ کیا جائے گا اور یکطرفہ فوجی اقدامات کو ہرگز برداشت نہیں کیا جائے گا۔