کینیڈا میں عید بازار سج گیا، پاکستانی ثقافت کے رنگ بکھر گئے

( کیلگیری) کینیڈا کے صوبے البرٹا کے شہر کیلگیری کے نارتھ ایسٹ علاقے میں واقع جینسز سینٹر میں ہر سال کی طرح اس سال بھی پاکستانی کمیونٹی کی جانب سے رنگا رنگ عید بازار کا انعقاد کیا گیا، جہاں پاکستانی ثقافت، روایات اور کھانوں نے شرکاء کی بھرپور توجہ حاصل کی۔

عید بازار میں خواتین کے لیے دیدہ زیب گارمنٹس، روایتی کھوسے، جیولری اور دیگر ثقافتی اشیاء کے اسٹالز سجائے گئے تھے، جبکہ مہمانوں کی دلچسپی کے پیشِ نظر پاکستانی پکوانوں سمیت مختلف ذائقوں پر مشتمل کھانوں کے خصوصی اسٹالز بھی قائم کیے گئے۔

تقریب میں پاکستانی کمیونٹی کے علاوہ دیگر برادریوں نے بھی بھرپور شرکت کی۔ کینیڈا جیسے ملٹی کلچرل ملک میں بین الثقافتی ہم آہنگی کو فروغ دینے کے لیے بنگلہ دیش، افغانستان اور بھارت کی نمائندگی بھی مختلف اسٹالز کی صورت میں موجود تھی، جسے شرکاء نے خوب سراہا۔

اس موقع پر شہریوں نے منتظمین اور اسٹال ہولڈرز کی کاوشوں کو خراجِ تحسین پیش کرتے ہوئے امید ظاہر کی کہ مستقبل میں بھی اس نوعیت کے میلوں اور ثقافتی تقریبات کا انعقاد جاری رکھا جائے گا، تاکہ پاکستانی کمیونٹی کے اتحاد، ثقافت اور باہمی روابط کو مزید مضبوط بنایا جا سکے۔