ایران کے جوہری ہتھیار اسرائیل اور مشرق وسطیٰ کے لیے خطرہ بن سکتے ہیں، ٹرمپ

ڈبلن: امریکی صدر ڈونلڈ ٹرمپ نے کہا ہے کہ اگر ایران جوہری ہتھیار حاصل کرنے میں کامیاب ہو جاتا تو اس کے نتیجے میں مشرق وسطیٰ، بالخصوص اسرائیل، کے لیے انتہائی سنگین خطرات پیدا ہو سکتے تھے۔

آئرلینڈ میں میڈیا سے گفتگو کرتے ہوئے ڈونلڈ ٹرمپ نے دعویٰ کیا کہ ایران جوہری ہتھیار بنانے کی صلاحیت حاصل کرنے سے صرف دو ہفتے کی دوری پر تھا۔ ان کے مطابق امریکا ایران کو جوہری ہتھیار حاصل کرنے کی اجازت نہیں دے گا۔

امریکی صدر نے سعودی آئل پائپ لائن پر ہونے والے حملے کا ذمہ دار بھی غالباً ایران کو قرار دیا، تاہم انہوں نے اس حوالے سے مزید تفصیلات فراہم نہیں کیں۔

ڈونلڈ ٹرمپ نے کہا کہ حوثی امریکا کے ساتھ جنگ نہیں چاہتے، جبکہ ایران سے یورپ کے بعض شہروں کو بھی خطرہ لاحق تھا۔ ان کا کہنا تھا کہ اگر ایران پر مزید ایک ہفتے تک حملہ نہ کیا جاتا تو ایران امریکا پر بھی حملہ کر دیتا۔

ٹرمپ نے آبنائے ہرمز کے حوالے سے بھی بڑا دعویٰ کرتے ہوئے کہا کہ اس پر امریکا کا کنٹرول ہے۔ انہوں نے امید ظاہر کی کہ ایران کے ساتھ جنگ جلد ختم ہو جائے گی۔

امریکی صدر کے مطابق جنگ کے خاتمے کے فوراً بعد عالمی منڈی میں تیل کی قیمتیں تیزی سے کم ہو سکتی ہیں۔

ٹرمپ کے ان بیانات کے بعد ایران، اسرائیل اور خطے کی سلامتی سے متعلق کشیدگی ایک بار پھر عالمی توجہ کا مرکز بن گئی ہے، جبکہ آبنائے ہرمز اور توانائی کی عالمی سپلائی پر ممکنہ اثرات بھی اہم موضوع بنے ہوئے ہیں۔