امریکا کی ایران پر نئی پابندیاں، 35 ادارے اور شخصیات نشانے پر

( واشنگٹن ڈی سی ) امریکا نے ایران کے خلاف اپنی پابندیوں کا دائرہ وسیع کرتے ہوئے مزید 35 اداروں اور شخصیات کو نشانہ بنایا ہے۔ یہ اقدام امریکی محکمہ خزانہ کی جانب سے کیا گیا، جس کے مطابق مذکورہ ادارے اور افراد ایران کے تیل کی اربوں ڈالر مالیت کی ترسیل میں معاونت کر رہے تھے۔

محکمہ خزانہ کے بیان میں کہا گیا ہے کہ یہ نیٹ ورک بینکاری اور تجارتی نظام کے ذریعے ایرانی تیل کو عالمی منڈی تک پہنچانے میں اہم کردار ادا کر رہا تھا، جس کے باعث ان پر پابندیاں عائد کی گئی ہیں۔

اس کے ساتھ ہی محکمے اوفیک نے ان بینکوں اور کمپنیوں کو بھی خبردار کیا ہے جو ایران کے ساتھ مالی لین دین میں ملوث ہیں، خاص طور پر وہ ادارے جو چینی ریفائنریز کے ساتھ کام کر رہے ہیں۔ بیان میں کہا گیا کہ چین کے صوبےشنڈونگ میں کئی آزاد کمپنیاں ایرانی تیل درآمد یا ریفائن کر رہی ہیں۔

امریکا نے یہ بھی عندیہ دیا ہے کہ وہ ان بینکوں پر مزید پابندیاں عائد کر سکتا ہے جو ان ریفائنریز کے ساتھ تعاون جاری رکھیں گے، خصوصاً وہ جہاز جو آبنائے ہُرمز کے ذریعے تیل کی ترسیل کرتے ہیں۔

ماہرین کے مطابق یہ پابندیاں خطے میں معاشی اور سفارتی کشیدگی کو مزید بڑھا سکتی ہیں، جبکہ ایران کی تیل برآمدات پر بھی اس کے نمایاں اثرات مرتب ہونے کا امکان ہے۔