مشرق وسطیٰ میں کشیدگی: امریکا کا اپنے شہریوں کو محتاط رہنے کا انتباہ، پروازیں متاثر ہونے کا خدشہ

اسلام آباد: مشرق وسطیٰ میں جاری کشیدگی کے پیش نظر امریکا نے خطے میں موجود اپنے شہریوں کو انتہائی محتاط رہنے کی ہدایت کی ہے، جبکہ خطے کا سفر کرنے والے امریکی شہریوں کو اپنے سفری منصوبوں پر سنجیدگی سے غور کرنے کا مشورہ دیا گیا ہے۔

امریکی محکمہ خارجہ کے مطابق مشرق وسطیٰ کی موجودہ صورتحال کے باعث امریکی شہری احتیاطی تدابیر اختیار کریں اور ممکنہ سفری رکاوٹوں کو مدنظر رکھتے ہوئے اپنے منصوبوں پر نظرثانی کریں۔

امریکی حکام نے خبردار کیا ہے کہ خطے میں صورتحال کے باعث فضائی سفر بھی متاثر ہوسکتا ہے۔ ممکنہ طور پر بعض فضائی حدود بند کی جاسکتی ہیں، جبکہ پروازوں میں تاخیر یا انہیں منسوخ کیے جانے کا بھی خدشہ ہے۔

عراق میں امریکی سفارتخانے کا انتباہ

عراق میں امریکی سفارتخانے نے بھی خطے میں موجود امریکی شہریوں کے لیے احتیاطی انتباہ جاری کیا ہے۔ سفارتخانے کے مطابق موجودہ حالات میں فضائی حدود کی بندش اور پروازوں کی منسوخی کا امکان موجود ہے، اس لیے شہری اپنی سفری ضروریات اور منصوبوں کا جائزہ لیتے رہیں۔

امریکی حکام کی جانب سے یہ ہدایات ایسے وقت میں سامنے آئی ہیں جب مشرق وسطیٰ میں کشیدگی کے باعث سکیورٹی اور سفری صورتحال پر تشویش میں اضافہ ہوا ہے۔

مسافروں کو مشورہ دیا گیا ہے کہ وہ روانگی سے قبل متعلقہ حکام، ایئرلائنز اور سفارتی ذرائع سے تازہ ترین معلومات حاصل کریں، کیونکہ صورتحال میں تیزی سے تبدیلی ممکن ہے۔