ایرانی پارلیمنٹ اسپیکر باقر قالیباف نے اسلام آباد آمد پر طیارے کی نشستوں پر شہید بچوں کی تصاویر شیئر کر دیں

( اسلام آباد)ایرانی پارلیمنٹ کے اسپیکر باقر قالیباف نے پاکستان کے لیے روانگی کے دوران طیارے کے اندر کی تصویر سوشل میڈیا پلیٹ فارم ایکس پر شیئر کی۔ انہوں نے تصویر کے ساتھ لکھا، "یہ میرے احباب ہیں"، جس نے سوشل میڈیا پر جذباتی ردعمل کو جنم دیا۔

باقر قالیباف کی جانب سے شیئر کی گئی تصویر میں امریکا اور اسرائیل کے حملوں میں شہید ہونے والے ایرانی بچوں کی تصاویر پھولوں کے ساتھ طیارے کی نشستوں پر رکھی دیکھی جا سکتی ہیں۔ نشستوں پر بچوں کے بستے اور جوتے بھی رکھے گئے تھے جو اس منظر کو مزید دلخراش بنا رہے تھے۔

اس خصوصی پرواز کو "مناب 168" کا نام دیا گیا، جو 28 فروری کو جنگ کے پہلے دن مناب کے اسکول پر ہونے والے حملے کی یاد میں رکھا گیا ہے۔ اس حملے میں 168 معصوم بچوں سمیت کئی افراد جاں بحق ہوئے تھے۔

سفارتی ذرائع کے مطابق ایرانی وفد ان تصاویر اور یادگار اشیاء کو اسلام آباد اپنے ساتھ لایا ہے تاکہ امریکا کے ساتھ ہونے والے اہم مذاکرات سے قبل عالمی برادری کو جنگ کے انسانی پہلو اور اس کے سنگین اثرات سے آگاہ کیا جا سکے۔

واضح رہے کہ ایران کا اعلیٰ سطحی وفد امریکا کے ساتھ اہم مذاکرات میں شرکت کے لیے اسلام آباد پہنچ چکا ہے، جہاں خطے کی صورتحال، جنگ بندی اور دیگر اہم معاملات پر بات چیت متوقع ہے۔