امریکی ناکہ بندی کا اعلان بھونڈا فیصلہ، مائن سویپر آگے بڑھا تو فائر کریں گے: قالیباف

(تہران)ایرانی میڈیا کے مطابق قالیباف نے کہا کہ امریکا نے ناکہ بندی کا اعلان کرکے خطے میں کشیدگی کو بڑھانے کی کوشش کی ہے، جبکہ ایران اس قسم کے اقدامات کو ہرگز قبول نہیں کرے گا۔ ان کا کہنا تھا کہ اگر دوسرے ممالک آبنائے ہرمز سے گزر سکتے ہیں تو ایران کو روکنا ناممکن ہے۔

قالیباف نے امریکی بحری سرگرمیوں پر بھی سخت موقف اختیار کرتے ہوئے کہا کہ امریکی مائن سویپر اپنی موجودہ پوزیشن سے ایک انچ بھی آگے نہ بڑھیں، بصورت دیگر ایران یقینی طور پر فائرنگ کرے گا۔ انہوں نے کہا کہ یہ پیغام امریکی وفد کو واضح طور پر پہنچا دیا گیا ہے۔

ایرانی اسپیکر نے دعویٰ کیا کہ حالیہ جنگی کشیدگی کے دوران ایران نے دشمن کے 170 سے 180 ڈرونز کو نشانہ بنایا، جبکہ امریکا کا جدید ایف 35 لڑاکا طیارہ بھی مار گرایا گیا، جو معمولی بات نہیں ہے۔

قالیباف کا کہنا تھا کہ ایران کی جنگی ٹیکنالوجی کی مکمل تفصیلات بتانا مناسب نہیں، تاہم دشمن کو ایران کی صلاحیتوں کا اندازہ ہو چکا ہے۔

انہوں نے اسلام آباد میں ہونے والی مذاکراتی پیشرفت کا ذکر کرتے ہوئے کہا کہ بات چیت میں کچھ پیشرفت ضرور ہوئی تھی، تاہم ابھی بھی دونوں فریقین کے درمیان خاصا فاصلہ باقی ہے اور مزید سفارتی کوششوں کی ضرورت ہے۔