’کراچی کو حق دو‘ کے بینرز بنانے والوں کی دکانیں سیل کر دیں گے: مرتضیٰ وہاب

( کراچی ) مرتضیٰ وہاب نے جماعت اسلامی پر تنقید کرتے ہوئے کہا ہے کہ شہر میں ’کراچی کو حق دو‘ کے بینرز لگانے سے مسائل حل نہیں ہوں گے، ایسے بینرز بنانے والے دکانداروں کی دکانیں سیل کرنے پر غور کیا جا رہا ہے۔

کراچی میں تقریب سے خطاب کرتے ہوئے میئر کراچی نے بلدیہ عظمیٰ کراچی میں ویجیلنس اسکواڈ کیلئے 20 الیکٹرک موٹر سائیکلوں کی فراہمی کا اعلان بھی کیا۔

ویجیلنس اسکواڈ کا قیام

مرتضیٰ وہاب نے کہا کہ وارڈنز کو پروٹوکول ڈیوٹی سے ہٹا کر ویجیلنس اسکواڈ کا حصہ بنایا جا رہا ہے۔ انہوں نے کہا کہ ان کے ساتھ کوئی وارڈن نہیں چلتا اور تمام وسائل شہر کی خدمت کیلئے استعمال کیے جائیں گے۔

ان کے مطابق ویجیلنس اسکواڈ درج ذیل امور کی نگرانی کرے گا:

• وال چاکنگ

• غیر قانونی پوسٹرز اور بینرز

• گرل کاٹنے کے واقعات

• اسٹریٹ لائٹس چوری

• شہر کے انفرااسٹرکچر کو نقصان پہنچانے والے عناصر

• پلوں کے نیچے نشہ کرنے والے افراد

گرین انرجی منصوبے

میئر کراچی نے بتایا کہ شہر کو گرین انرجی پر منتقل کیا جا رہا ہے، جبکہ کے ایم سی بلڈنگ پہلے ہی سولر پر منتقل ہو چکی ہے۔ اسپتالوں اور پمپنگ اسٹیشنز کی سولرائزیشن بھی جاری ہے۔

انہوں نے مزید کہا کہ مستقبل میں فیول کی بچت کیلئے ٹرانسپورٹ کو بتدریج الیکٹرک وہیکلز پر منتقل کیا جائے گا۔

ترقیاتی منصوبوں پر دعویٰ

مرتضیٰ وہاب نے دعویٰ کیا کہ لیاری ٹرانسفارمیشن اور شاہراہ نور جہاں جیسے منصوبے کے ایم سی نے مکمل کیے مگر کریڈٹ کوئی اور لے رہا ہے۔

میئر کراچی نے کہا کہ شہر کی بہتری کیلئے تمام سیاسی جماعتوں کو متحد ہونا ہوگا اور سیاسی منافقت سے کراچی کا کوئی بھلا نہیں ہو سکتا۔