انڈیانا میں خالصتان ریفرنڈم کا آغاز، سکھ ووٹرز کی بڑی تعداد ووٹنگ سینٹر پہنچ گئی

انڈیاناپولس: امریکی ریاست انڈیانا کے شہر انڈیاناپولس میں خالصتان ریفرنڈم کا آغاز ہوگیا، جہاں سکھ برادری کی بڑی تعداد ووٹنگ کے لیے رچرڈ جی لُوگر پلازا میں قائم ووٹنگ سینٹر پہنچ گئی۔

ریفرنڈم کا انعقاد امریکہ میں قائم سکھ تنظیم سکھس فار جسٹس (SFJ) کی جانب سے کیا جارہا ہے۔ ووٹنگ میں سکھ ووٹرز سے یہ رائے لی جارہی ہے کہ آیا بھارتی زیرِ انتظام پنجاب کو بھارت سے الگ کرکے ایک آزاد ریاست خالصتان قائم کیا جانا چاہیے۔

ریفرنڈم کی سرگرمیوں کا آغاز سکھ مذہبی دعائیہ تقریب سے ہوا، جہاں سکھ روایات کے مطابق دعائیں کی گئیں اور خالصتان کے قیام کی خواہش کا اظہار کیا گیا۔ اس موقع پر سکھ تحریک کے دوران جانیں گنوانے والے افراد کو بھی خراجِ عقیدت پیش کیا گیا۔

منتظمین کے مطابق ووٹنگ صبح 9 بجے شروع ہوئی اور شام 5 بجے تک جاری رہے گی۔ ووٹنگ کے آغاز کے بعد سوشل میڈیا پر سامنے آنے والی ویڈیوز اور تصاویر میں ووٹرز کی قطاریں بھی دیکھی گئیں۔

SFJ کے مطابق ریفرنڈم کا بنیادی سوال یہ ہے کہ کیا بھارتی زیرِ انتظام پنجاب ایک آزاد ملک ہونا چاہیے؟ تنظیم کا مؤقف ہے کہ بیرونِ ملک ہونے والی یہ ووٹنگ عالمی سکھ برادری کی رائے جاننے کی مہم کا حصہ ہے، جبکہ نتائج اقوام متحدہ کے سامنے پیش کرکے پنجاب میں مستقبل میں بین الاقوامی نگرانی میں ریفرنڈم کرانے کا مطالبہ کیا جائے گا۔

SFJ کے رہنما گروپت ونت سنگھ پنوں نے انڈیانا میں ہونے والی ووٹنگ کو سکھوں کے حقِ خود ارادیت کی مہم کا حصہ قرار دیا ہے۔ تنظیم کا کہنا ہے کہ سکھ برادری کو اپنے سیاسی مستقبل کے تعین کا حق حاصل ہونا چاہیے۔

انڈیاناپولس میں ہونے والی ووٹنگ خالصتان ریفرنڈم کی بین الاقوامی مہم کا تازہ مرحلہ ہے۔ اس سے قبل امریکہ، کینیڈا، برطانیہ، آسٹریلیا اور دیگر ممالک میں بھی سکھ برادری کے درمیان اسی نوعیت کی ووٹنگز منعقد کی جاچکی ہیں۔